Qyzylordada elektrondyq balabaqsha júıesi iske asyrylýda. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamentiniń uıymdastyrýymen ótkizilgen ǵylymı-tájirıbelik konferensıada oblystyq bilim basqarmasynyń basshysy Maıra Meldebekova málimdedi.
Konferensıaǵa qalalyq, aýdandyq bilim bólimderiniń, oblystaǵy joǵary oqý oryndarynyń, tehnıkalyq jáne kásiptik bilim berý uıymdarynyń, mektepterdiń, balabaqshalardyń basshylary men qyzmetkerleri qatysty.
Búgingi tańda oblys ortalyǵyndaǵy balabaqshalarda balanyń birneshe ret tirkelýin boldyrmaý maqsatynda elektrondy júıe engizildi. Sondaı-aq, balabaqshaǵa kezekke qoıý, qujattardy tapsyrý, balalardy qabyldaý prosesteri avtomattandyrylǵan.
- «Bul óz kezeginde sybaılas jemqorlyqtyń aldyn alý maqsatynda ata-anamen bilim bólimderi arasynda tikeleı baılanysty azaıtyp, ata-analarǵa úıinde otyryp elektrondy túrde ótinish jasaýǵa múmkindikter týǵyzdy. Jyl sońyna deıin aýdandardy da osy baǵytqa kóshirý maqsatynda jumystar júrgizilýde» - deıdi M.Meldebekova.
Sonymen qatar, balabaqshalardyń talapqa sáıkestigin, búdjetten bólingen qarjynyń maqsatty jumsalýyn anyqtaý maqsatynda qurylǵan jumys toby oblys boıynsha zerdeleý jumystaryn júrgizýdi josparlaýda. Jumys tobyna tıisti quzyrly organdardan qyzmetkerleri tartylady. Bul jumys toby turaqty túrde balabaqshalarǵa, ásirese jekemenshik balabaqshalardyń sapasyna monıtorıń júrgizetin bolady.
Konferensıa barysynda Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti basshysynyń orynbasary Berikbol Baıhojaev, - «Áli de bolsa mektepterde, balabaqshalarda ata-analardan zańsyz aqsha jınaý kezdesedi. Jóndeýge, basqa da is-sharalar uıymdastyrýǵa dep zańsyz aqsha jınaý faktilerin túbegeıli joıýdy bilim salasyndaǵy mekeme basshylaryna qatań eskertemiz. Ata-analar ondaı shyǵyndardy tóleýge mindetti emes. Bilim berý uıymynyń shyǵystaryna búdjetten qajetti kólemde qarajat bólinýde» - dedi.
