Aýyr naýqasqa shaldyqqan qazaqstandyq kishkentaı Bogdan Koreıada emdelip jatqan edi. Alaıda qaterli isik baladan myqty bolyp shyqty, 23 qyrkúıek kúni Bogdan máńgilik saparǵa attanyp ketti. Balasynyń emine qomaqty qarjy jınap jantalasyp júrgen ata-ananyń úmiti úzildi. Ananyń júregine qanjardaı tıgen aýyr soqqy - Bogdan qaıtys bolsa da, eline, úıine balanyń múrdesin qaıtara almaýy. Sebebi ata-anasy Koreıadaǵy aýrýhanaǵa $98 000 qaryz eken. Qaıǵysy men kúıinishi aralasqan ana ulynyń óli denesin aýrýhanadan shyǵaryp, Qazaqstanǵa qaıtarý úshin otandastarynan kómek suraıdy.
«Qymbatty dostarym, sizderge ulynan, júregi men janynan aıyrylǵan ana retinde jazyp otyrmyn. Aıtarǵa sóz taba almaımyn... Kóńilimdi muń basty, oıym san-saqqa ushyrady, úmitim de qalmady. Bogdan – meniń ómirim, janym, erteń atpaıtyn jaryq kúnim. Endi ol maǵan «Anashym, men seni jaqsy kóremin» dep aıtpaıdy. Óziniń kishkentaı ǵana álsiz qoldarymen meni qushaqtamaıdy. Tipti balamnyń janyna baryp, súıip, ony qushaǵyma basa almaı otyrmyn. Basyna baryp, jylaı da almaıtyndaımyn. Qudaıym-aı, bar úmitim soldy. Endi perishtemniń, balapanymnyń denesin alyp ketý úshin materıaldyq qaryzdy óteýim kerek. Júregim qars aıyryldy, alaıda «balapanyń úshin kúres» dep týlap jatyr. Ol quddy bir lombardtaǵy nemese banktaǵy kepil sekildi. Nesin aıtaıyn, kishkentaı ómir – qomaqty aqsha. Sol qomaqty aqsha balamdy emdep-jazý úshin kerek edi. Al endi balamnan aıyrylsam da qomaqty aqshaǵa zárýmin. Klınıka aldyndaǵy qaryzym $98 000 eken. Balam o dúnıelik bolsa da myna aýrýhana men myna elden kete almaı otyr. Bogdan óz úıine, oıynshyqtaryna, anasy men ákesine erkeleıtin baqytty mekenine barǵysy keldi. Alaıda taǵdyrdyń jazýy ma, Qudaıdyń qalaǵany ma, balamnyń qalaǵany oryndalmady. Dostar, balamnyń, endigi perishtemniń armanyn oryndaýǵa sizder kómektesińizdershi. Bogdanymdy úıge alyp keteıik. Balapanymnyń jany, eń quryǵanda, kókte tynysh bolsyn. Balasynan aıyrylǵan ana retinde surap otyrmyn, júregimdi úıge qaıtarýǵa kómektesińizdershi. Perishteler ólmeıdi, olar qashan da bizben birge... Ótinemin, kómektesińizder!» - dep jan syryn aqtardy anasy.
Sońǵy derekterge sáıkes, Qazaqstan elshiliginiń kómegimen qarjy somasy $90 000-ǵa azaıǵan. Onyń $15 671-y óteldi. Qalǵany – $74 381. Al elshilik balany elge qaıtarý úshin kómek kórsetietinin jetkizipti. Tolyq aqparatpen INSTAGRAM jelisindegi @ svetlyachok_bogdan paraqshasy arqyly tanysa alasyzdar.
