«Ár túrki memleketi Túrkistanǵa bir-birden aýdan salyp berse», - dep jazdy Feısbýk qoldanýshysy Sadyq Sherimbek Elbasynyń Túrkistan oblysyndaǵy saparynan keıin. Tipti Sadyq Sherimbek aýdandardy qalaı ataýǵa bolatynyna deıin usynys tastapty.
«Ol aýdandardy sımvolıkalyq túrde sol elderdiń atymen ıakı astanalarynyń atymen atap qoısaq. Mysaly, Túrkıa/Ankara aýdany, Ázirbaıjan/Baký aýdany, Majarystan/Býdapesht aýdany, Ózbekstan/Tashkent aýdany, Túrkimenstan/Ashqabad aýdany, Tatarstan/Qazan aýdany», - dep jazdy Sadyq myrza.
Sóz sońynda, Túrkistandy kúlli túrki eliniń astanasy dep urandatyp júrgen memleketterge sózderin ispen dáleldese degen nıetin bildirdi. Al jeli qoldanýshylary Feısbýk belsendisiniń bastamasyn qoldaı ketti.
Aıta keteıik, qyrkúıektiń sońynda Nursultan Nazarbaev resmı saparmen Túrkistan oblysyna bardy. Sapary barysynda Túrkistan oblysyn damytýdaǵy túrli joldardy atap, 2-3 jylda eńsesi bıik oblys qurylaryna senim bildirdi. Ári Túrkistannyń taǵlymy mol tarıhyna toqtalyp ótip, tek qazaq eli úshin ǵana emes, búkil túrki halyqtary úshin rýhanı Astana ekenin atap ótti.
«Qasıetti Túrkistanǵa degen maqtanysh sezimi ár qazaqtyń júreginde uıalaǵan. Túrkistan tek bizge ǵana emes, kúlli túrik jurtshylyǵyna qasıetti ári qadirli meken. Halqymyzda «Mádınada Muhammed, Túrkistanda Iassaýı» degen sóz bar. Osyndaı san alýan faktorlar Túrkistandy tutas turan dodasynyń, túbi bir túrki jurtynyń rýhanı ortalyǵyna aınaldyrdy. Túrki áleminiń mádenı ortalyǵyn dep tanyldy», - dedi Túrkistanǵa barǵan saparynda.
Elbasy Túrkistannyń túrki elderine ortaq ekenin buǵan deıin de talaı márte aıtyp keledi. Máselen Túrki elderiniń VI samıtinde túrki memleketterine oblysty damytýda birlesip jumys isteý kerektigin tilge tıek etken.
«Ejelden qasıetti sanalatyn Túrkistan oblys ortalyǵy boldy. Osylaısha, túbi bir túrki halyqtary úshin qasterli ataý óz mártebesin aldy. Bul – bizdiń tutastyǵymyzdy nyǵaıtyp, birligimizdi bekemdeı túsetin tarıhı oqıǵa», - degen edi memleket basshysy. Bul sózin Túrkıaǵa ári Qyrǵyzstanǵa barǵan saparlarynda da qaıtalap otyrdy.
Túrkistan oblysyn damytý jumystaryn bastap ketken memleketter de joq emes. Máselen 30 jyldan beri bıznes salasynda kósh bastap kele jatqan Túrkıanyń «DAL Holding Investment Company» holdıńi Túrkistan oblysynyń 200 gektar jer aýmaǵynda ınvestısıalyq quny 500 mln AQSH dollaryna quraıtyn jylyjaı salýǵa nıet bildirdi. Buǵan qosa «Dilmen Dekorasyon inş. Taah. Tic. Ltd Şti» kompanıasy 2019 jyly Túrkistan oblysynda jıhaz shyǵaratyn fabrıkanyń qurylysyn bastaýdy josparlap otyr.
Túrkistandy damytýda elimizdiń ár óńiri de qalys qalyp jatqan joq. Ár oblys bıyl ǵana qurylǵan jańa ári rýhanı oblysqa bir-bir ǵımarattan syıǵa tartatyn boldy. Jalpy, Elbasy Túrkistannyń tanymastaı ózgeshe qalaǵa aınalaryna senimdi.
Munyń bárin saralaı kele, jastar arasynda Michael Sherimbek degen atpen tanymal Feısbýk qoldanýshysynyń pikirin nege qoldamasqa degen oı keledi.
