«7-20-25» baǵdarlamasy aıasynda páterge aıyna 100 myń teńge tóleıtin adamdardyń sany ósken. Bul týraly Qamshy.kz aqparat agenttigi «Baspana» ıpotekalyq uıymyna silteme jasap habarlady.

Baspana mamandarynyń pikirinshe, qaryz alýshylardyń 60 paıyzy páterge aıyna 100 myń teńgeden tóleıdi. Al qaryz alýshylardyń 6 paıyzy eń joǵarǵy somadaǵy qarjyny tóleıdi. Astana, Almaty, Atyraý, Aqtaý jáne Shymkent qalalarynyń turǵyndary páterdi nesıege 20 mıllıon teńgege, ózge qalalarda 12 mıllıon teńgege alǵan. Qaryz alýshylardyń kóbi, jalpy kórsetkishtiń 37 paıyzy 10 mıllıonnan 15 mıllıonǵa deıingi aralyqta nesıe alǵan.

«Baǵdarlama óziniń áleýmettik baǵytyn aıqyndaı aldy. Alaıda mynany umytpaýymyz kerek: 7-20-25 – eń aldymen jyldamdyq, qaıtarym, ýaqytyly tólem prınsıpterine negizdelgen ıpoteka. Ol kez-kelgen qazaqstandyq jumysker úshin qoljetimdi, tek bank-seriktesterine óziniń tólem múmkindigin dáleldese, naqtylasa bolǵany», - dedi «Baspana» Ipotekalyq uıymynyń basqarma tóraǵasy Qaırat Altynbekov.

24 qazandaǵy jaǵdaıǵa sáıkes, 7-20-25 baǵdarlamasy boıynsha qaryz alýshylardyń eshqaısysy tólemdi keshiktirmegen. Jalpy qazaqstandyqtar 44,5 mıllıard teńgege ótinish bergen. Onyń 30 mıllıard teńgesi, ıaǵnı 2513 ótinish bankter tarapynan maquldanǵan.

Aıta keteıik, buǵan deıin QR Ulttyq banki «7-20-25» baǵdarlamasyna qatysatyn seriktes bankterdi atap shyqqan. Olar: Bank Sentrkredıt, Eýrazıa banki, ATF bank, RBK banki, Sesna bank, Turǵyn úı qurylys jınaq banki jáne Halyq banki. Al jyl sońyna deıin Sberbank pen Forte bank qosyldy.

Baǵdarlama boıynsha jylyna 7 paıyz ústememen 25 jylǵa beriledi. Alǵashqy jarna – 20paıyz.

Jańa ıpotekalyq qaryzdy Qazaqstan Respýblıkasynyń kez kelgen azamaty ala alady. Tek basynda jyljymaıtyn múlki bolmaýy shart. Baǵdarlama boıynsha Qazaqstannyń kez kelgen óńirinen Almaty, Astana, Atyraý qalalarynan eń maksımaldy 25 mıllıon teńgege, qalǵan óńirlerde 15 mıllıon teńgeden baspana satyp alýǵa bolady.