Qandaı sorly, beıshara elmiz? Komsomoldyń 100 jyldyǵy endi aýyl-aýyldarǵa kóshti. Toılap jatyr, toılatyp jatyr. Semeıde, Atyraýda, basqa aımaqtarda...

Qartaıǵan aǵa býyn jas urpaqtyń sanasyn ýlap jatyr. Sumdyq qoı.  Qalaı el bolamyz? Bolatyn el bolashaqqa qaraýshy edi?! Biz artymyzǵa qaraımyz. Qazaqty qan qaqsatqan komýnıserdiń bel balasy komsomoldyń 100 jyldyǵyn toılaý áli jer-jerde jalǵasyp jatyr. Bul rýhanı jańǵyrý ma? Búıtip, jańǵyrmaı-aq qoıaıyq.

Keńestik júıege adal qyzmet  etken aǵa komýnıserdiń búgingi tirligin qalaı aqtap alamyz?! Qaıtpek kerek?

♦O, komsomol, sen áli tiri me ediń?!

♦Taǵy da komsomol, taǵy da Lenın!

Bılik basyndaǵy burynǵy komýnıserden qutylmaı, sana tazarmaı, júzjyldyqtardy toılaý jalǵasa beredi. Osylaı quldyq psıhologıada júrgenimiz júrgen!  Memleketti damytýdaǵy ulttyq ıdeologıa joq jerde qajetsiz urandy ultqa qatysy joqtar kóteredi.

Búgingi bizdiń bılikke ózine eshqashan qarsy shyqpaıtyn osyndaı komýnıser kerek. Olarǵa Kosarev pen Ahmetbekovtyń qyzyl jalaýy jaqsy. Búırekten sıraq shyǵarmaı, másele kótermeı, qarsy kelmeı, eseptegi partıa bolyp parlamentte júrgeni durys!

Namysyń keledi. Biz qaı elde turyp jatyrmyz? Keńes Odaǵynyń murageri Reseıde, Pýtınniń elinde me? Joq, Qazaqstanda ma?

Ýkraına búkil kommýzımniń elesinen, kún kósem Lenınnen qutyldy. Eldegi myńdaǵan eskertkishterdi alyp tastady.

Keńestik kezeńde oqyǵan azamattar jaqsy biledi, baıaǵyda «Ana tili» oqýlyǵynda:

«Moınymda – qyzyl galstýk,

Mektepke qaraı júgirdim», –degen óleń joldary bar edi.

...Al táýelsizdik alǵan Qazaqstannyń búgingi balasy 27 jyldan keıin komsomoldyń 100 jyldyǵynda moınyna  taǵy qyzyl galstýk baılady. Biz aýyldaǵy mektepte sanasy taza qazaq balasyn ýlap, moınyna qannyń taby qalǵan qyzyl galstýkty baılap jatyrmyz.

...Qylqyndyryp jatyrmyz!

Quralaı Qýat (foto)