«Aq jol» fraksıasy qazaq eliniń adamzat órkenıetine («Progresıvti Qazaqstan») qosqan úlesi men orasan jetistikterin zerdeleýge arnalǵan jyl saıynǵy jas ǵalymdardyń jalpyulttyq baıqaýyn uıymdastyrýdy usynady. Tıisti depýtattyq saýaldy Májilistiń plenarlyq otyrysynda Berik Dúısembınov málimdedi (saýaldyń tolyq mátini tómende kórsetilgen).

Mádenıet jáne sport mınıstrine

Bilim jáne ǵylym mınıstrine

DEPÝTATTYQ SAÝAL

Ulttyq ustanymy bar kóptegen adamdar úshin Nursultan Ábishulynyń «Uly dalanyń jeti qyry» atty maqalasy naǵyz jańalyq boldy.

Birneshe býyn urpaqtarynyń uǵymynda ulttyq tarıhymyz qazaq halqynyń bastan keshken bitpeıtin qasireti men tragedıalyq oqıǵalary dep qabyldanyp júr.

Bul qaıǵy-qasiret qazaqtyń basyna túsken sharasyz taǵdyry degen jalpy pikirdi qalyptastyrdy.

Mundaı kózqarasqa túrtki bolǵan tarıhı negizder jetkilikti: bul Aqtaban-shubyryndy zamany, alapat asharshylyq, 30-shy jyldardaǵy saıası qýǵyn-súrgin, «Alash» qozǵalysy kóshbasshylarynyń qurban bolýy, Jeltoqsan oqıǵasy jáne 80-shi jyldardaǵy qazaq jastaryn qýdalaý...

Múmkin, sol sebepten bolar, biz áli kúnge deıin ulttyq tarıhymyzdy azap shegýdiń tarıhı konsepsıasy aıasynda aman qalý úshin bitispeıtin kúres dep túsinemiz.

Alaıda, Memleket basshysy tarıhı pozıtıvızm turǵysynan ótkenniń jańa tusyn kórsetip berdi.

Onyń ústine, Prezıdent árbir sózdi mysaldarmen dáleldep, naqty derekterge súıene otyryp, tolyq ashylmaǵan dúnıelerdi ǵylymı turǵydan zertteýge shaqyryp otyr.

Keıbir keltirilgen mysaldar burynnan belgili, alaıda tek Nursultan Ábishuly ǵana bir júıege biriktirip, birtutas tetikte qarastyrdy.

Atqa miný mádenıeti men jylqy sharýashylyǵy, kóne mettallýrgıa men zergerlik óner, eginshilik sharýashylyǵy men qala qurylysy dástúri, Uly jibek jolynda órkenıet pen tehnologıalardyń túıisýi....

Alǵan áserimizge súıensek, Prezıdenttiń maqalasy arqyly biz buryn kózge ilmeı, mán bermegen, al Elbasy áýelden nazar aýdarǵan dúnıege qaıta qarap, saralaýǵa týra keldi.

Jáne bul ótkendi saralaý, salystyrý ulttyq rýh pen abyroıymyzdy asqaqtatty. Sóıtse, bizdiń tarıh tek qandy shaıqaspen kelgen jeńisterimen ǵana emes, ashyqtyǵymen, aqyl-parasatynyń, oı-órisiniń bıiktigimen, jalpy adamzattyq sıvılızasıanyń qaryshtaýyna yqpal etken jańalyqtarymen, sharýashylyq salty jáne turmys sapasymen de dańqty ekenin túsindik.

Buryn biz ulttyq ustanymy bar adamdardyń atyna aıtylǵan ksenofobıa, qazaqtyń tragedıasynyń zarlaýshysy degen syndy jıi estıtinbiz. Alaıda Prezıdenttiń maqalasy kún tártibindegi ulttyq taqyrypty túbegeıli ózgertedi: budan bylaı ulttyq múddeni kózdeýshiler progresshil jáne novatorlyqqa qabiletti tulǵa ekenin dáleldeıdi.

Nursultan Ábishuly óziniń teńdessiz zertteýi arqyly tarıhı ǵylymnyń jańa baǵytyn ashyp berdi, atap aıtsaq: kúlli adamzattyń damýyna yqpal etken jáne qazirgi Qazaqstannyń aýmaǵynda bolyp ótken qasiretti ǵana emes, pozıtıvti erlikterdi zerdeleýge jol ashty.

Bul kóp jumys pen kásibılikti talap etedi, óıtkeni shaıqastar men qaıǵy-qasiretke qaraǵanda jaǵymdy jańalyqtar urpaqtan urpaqqa jalǵasyn taýyp, beıne bir mindetti sıaqty bolyp qalady. Sondyqtan bolar, zamandastardyń jadynda jarqyn túrde este saqtalyp qala bermeıdi.

Prezıdenttiń atqarǵan eńbegi neǵurlym qundy bolǵan saıyn, soǵurlym ony kópshiliktiń kúsh-jigermen jalǵastyrý laıyqty bolmaq.

Osyǵan oraı, «Aq jol» fraksıasy qazaqstandyqtardyń keleshek urpaǵy úshin tarıhı pozıtıvızmniń mańyzdylyǵyn eskere otyryp, qazaq eliniń adamzat órkenıetine («Progresıvti Qazaqstan») qosqan úlesi men orasan jetistikterin zerdeleýge arnalǵan jyl saıynǵy jas ǵalymdardyń jalpyulttyq baıqaýyn uıymdastyrýdy usynady.

Baıqaý barysynda stýdentter men jas mamandar zertteý nátıjeleri týraly baıandama jasap, ózderiniń tujyrymdaryn ashyq ǵylymı talqylaýda qorǵap, tarıhı shyndyq pen oıdan shyǵarylǵan qıaldyń ara jigin ajyratyp, óziniń kásibıligi men Qazaqstannyń tarıhyn pozıtıvti, ıaǵnı jaǵymdy jaǵynan tanytýǵa qosqan úlesine saı memlekettiń qoldaýyna ıe bolar edi. Baıqaý nomınasıalary «Uly dalanyń jeti qyry» maqalasyna sáıkes belgilense: muraǵat-2025, uly esimder, túrki álemi, óner jáne tehnologıalar.

«Aq jol» fraksıasy óz áriptesterin alda kele jatqan Tuńǵysh Prezıdent kúnimen quttyqtaı otyryp, Qazaqstan halqyna baq pen bereke jáne tolaǵaı tabystar tileıdi!

Qurmetpen, «Aq jol» fraksıasynyń depýtattary