"JYLAMASHY, AÝYRYP QALASYŃ"

Qańtardyń 10-y kúni tańǵy saǵat onda bastalǵan jaryssóz tústen keıin úshte aıaqtaldy. İske tóraǵalyq etken sýdıa Samıddın Temirálıev 12 alqa bımen eki saǵat keńesip bolǵan soń úkimdi oqydy. Sheshimdi aıyptalýshy men onyń zańdy ókili – sheshesi, qorǵaýshysy jáne jábirlenýshi balanyń anasy tyńdady.

Sýdıa 2002 jyly Ońtústik Qazaqstan oblysy (qazirgi Túrkistan oblysy – red.) Saryaǵash aýdanyndaǵy mektepterdiń birinde oqyǵan 8-synyp oqýshysyn Qylmystyq kodekstiń 121-baby "Seksýaldyq sıpattaǵy zorlyq-zombylyq áreketter" baby boıynsha kináli dep tanyp, 7 jylǵa bas bostandyǵynan aıyrdy. Sottalýshy jazasyn kámeletke tolmaǵandarǵa arnalǵan túzeý mekemesinde óteýi tıis. Sot úkimi kúshine engen joq. Aıyptalýshy tarap apelásıalyq shaǵym túsirýge ýaqyty bar.

Aıyptalýshyny arnaıy kúzet sot zalynan alyp ketti.

Sýdıa úkimdi oqyp jatqanda sottalýshynyń sheshesi balasyn qushaqtap jylaı bastady. "İstegen joqsyń ǵoı. Zorlaǵan joq qoı" dep oryndyqty uryp aıqaılady. Sottalýshy anasyn jubatpaq bolǵan. Biraq sheshesi ulyn qushaqtap, "kinásizsiń ǵoı, sen istemediń ǵoı" dep daýys kótere jylady. "Mama, jylamashy. Aýyryp qalasyń" dedi aıyptalýshy sheshesin qushaǵyna alyp.

Sottalýshynyń sheshesi alqa bılerdi qolymen nusqap "senderge senip edim" dedi. Alqa bıler aıqaı salyp jylaǵan áıeldiń sózin sońyna deıin tyńdamaı zaldan shyǵyp ketti.

Polıseıler sot zalynan balany qamaýǵa alyp ketip bara jatqanda sottalýshynyń anasy arttarynan jylap júgirdi. Dálizge jetkende esinen tanyp qulady. Áldebireý "jedel járdem shaqyryńdar" dep aıqaılady. Betine sý shashqan soń esin jıǵan áıel sot dálizinde "balamnyń ómiri ne bolady?" dep taǵy jylady.

Aıyptalýshynyń ákesiniń aǵasy sot úkimimen kelispeıtin, sot-medısınalyq saraptama qorytyndysynda "bala zorlanbaǵan" dep jazylǵanyn, apelásıalyq shaǵym túsiretinderin aıtty.

Sotqa "zorlanǵan bala" qatysqan joq. Jábirlenýshiniń sheshesi men advokaty sot úkimimen kelisetinin, apelásıalyq shaǵym túsirmeıtinin jetkizdi.

Jábirlenýshiniń naǵashy ájesi Sharıpa Batyrbekovanyń aıtýynsha, "zorlanǵan bala" men onyń sheshesi qazir Almatyda turyp jatyr. Bala osy qaladaǵy mektepterdiń birinde oqıdy.

SOTQA TÚRTKİ BOLǴAN OQIǴA

​2018 jyly naýryzdyń 13-i kúni Saryaǵash aýdanyndaǵy Abaı aýylynda turatyn Sharıpa Batyrbekova Azattyqqa jeti jasar jıenin 2017 jyldyń tamyzynan beri joǵarǵy synyp oqýshylary birneshe márte "uryp, zorlaǵanyn" aıtqan. Ol jergilikti polısıaǵa der kezinde shaǵymdanǵanymen, tek úshinshi ret barǵanda ǵana aryzyn qabyldaǵanyn jetkizgen.

Saryarqa aýdandyq bilim basqaramasy "saraptama qorytyndysy zorlaý oqıǵasynyń bolmaǵanyn anyqtady" dep málimdegen. Aıyptalýshy men jábirlenýshi oqyǵan mekteptiń ujymy da "bala zorlaý oqıǵasyn" joqqa shyǵarǵan. Keıin "zorlanǵan balanyń" týystary táýelsiz saraptama jasaýdy talap etken.

Bul habar áleýmettik jelide keń tarap, aqparat quraldarynyń nazaryna ilinip, áleýmettiń ashý-yzasyn týdyrǵan.

Byltyr tamyz aıynda Qazaqstan bas prokýratýrasynyń tergeý toby Túrkistan oblysy (burynǵy – Ońtústik Qazaqstan oblysy) Abaı aýylynda "zorlanǵan bala" isi boıynsha 14 keshendi sot saraptamasy men tórt túrli zertteý júrgizilgenin málimdegen.

"Tórt kúdiktiniń ishinde bireýi ǵana 14 jasqa tolǵan. Onyń isi Qylmystyq kodekstiń 121-babynyń 4-bóligine ("Kámeletke tolmaǵan balaǵa qatysty seksýaldyq sıpattaǵy zorlyq-zombylyq áreketteri") sáıkes keledi. Qalǵandaryna qatysty qylmystyq is toqtatyldy. Sebebi olar 14 jasqa tolmaǵan. Oqıǵanyń basqa mán-jaıy jarıalanbaıdy" dep habarlaǵan bas prokýratýranyń baspasóz qyzmeti.

Jabyq sot prosesi qyrkúıektiń 26-sy kúni bastalǵan.