Qazir keýdesine jez-temirden salpynshaq taqpaǵan adam qalmady-aý, sirá. Baı da, jarly da, qatysy bar da, qatysy joq ta taǵyp jatyr, taǵyp jatyr, taǵyp jatyr... Jıyn-saltanattarda qol shapalaqtaýdan sharshaısyń, tipti. Pálendeı eldiń qurmetti azamaty, pálen mekemeniń pálen jyldyǵynyń mereıtoılyq tósbelgisi, pálen salanyń úzdigi... «Eńbegim bar ma, joq pa, laıyqpyn ba, laıyq emespin be?» dep jatqan biri joq. Selfıletip, fotolatyp, áleýmettik jelini jaýlap aldy. Memlekettik nagrada bolsa meıli ǵoı, túrli qoǵamdyq uıymdardyń, mekemelerdiń arzanqol madaq-marapattary. Belgisiz uıymdardyń belgisiz tóraǵalary qolyn qoıyp, jeke kásipker dep tirketken mórlerin basyp, esepsiz úlestirip jatyr. Mundaı «marapattar» aqyly. Tóle de – ala ber! Bir sáttik aldanysh, bir mezettik qýanysh. Sosyn temir-tersegińizdiń eshkimge keregi joq, bala-shaǵaǵa aldanysh, oıynshyq bolary daýsyz... 

Sonda myna jurt jalǵan ataqqa nesine umtylyp jatyr? Qaıtpekshi bul temir-tersekti? Álde, dańq-marapatqa etimiz úırenip qaldy ma? Álgi tirkeýsiz tósbelgilerin sarǵaıtyp, tot basyp ketkenshe keýdelerinen tastamaı taǵyp júretinderdi qaıtersiń?! Sonysyn suq saýsaǵymen shuqyp kórsetip, «meni baıqa!» dep qorqytatyndar da az emes. Bir japyraq Alǵys hatynyń sýretin áleýmettik jelige salyp, «al, quttyqtasańdar bolady!» dep tanaýyn kókke kótere «laık» jınaýǵa asyǵatyn zamandastarymyz da jeterlik. Jappaı – haıp! «Haıp» dep otyrǵanymyz jalǵan ataq qýyp, pıarlatyp nemese ózin-ózi jarnamalaýda aldyna jan salmaıtyn jandarǵa arnalǵan jańa neologızm.

Kezinde Móńke bı: «Azarsyń, jurtym, azarsyń, Azaryńnyń belgisi: Quny joq qaǵazdy sýdaı shasharsyń...» dep eskertip edi, álde sonyń kebi keldi me eken?

Bıyl – Jastar jyly ǵoı. Osyǵan oraı mende usynys bar. Memlekettik nagradadan basqa barlyq jalǵan ataq-dańq, aqyly tósbelgilerge MORATORII jarıalaıyq! Medal taratqyshtar odan góri úısiz-kúısiz júrgen JASTARǴA baspana syılasyn, zeınet jasyna jetse de ornyn bosatpaı otyrǵan shal-shaýqandy qurmetti demalysqa jiberip, talantty da isker jastarǵa jumys taýyp bersin, elimizdi baıytýdy kózdeıtin jastarǵa arzan nesıe áperip, shaǵyn bıznespen aınalysýyna múmkindik jasasyn, kreatıvti oılaıtyn jastardyń depýtattyqqa, basqa da saılanbaly organdarǵa umtylýyna jol ashsyn!

Elbasymyz osy jyldy Jastar jyly dep jarıalaı turyp: «Bizdiń jastarymyzdy, Qazaqstannyń bolashaǵyn ár salada qoldaýymyz kerek», – dep úlkenderge, bizderge, úmit artyp edi ǵoı. Endeshe, qoldan kelse qýattaıyq ta!

Bekjigit Serdáli