2019 jyldyń 15 qańtarynda QR Eńbek jáne áleýmettik qorǵaý mınıstri Mádına Ábilqasymova Total.kz tilshisine bergen suhbatynda Qazaqstandaǵy kópbalaly ata-analardyń alyp júrgen járdemaqysyn «óte kóp» degen edi.

Aıtýynsha, qazaqstandyq analar memleket búdjetinen mıllıondaǵan aqsha alady eken. Mınıstrdiń aıtqanyna shamdanbaǵan, ashýǵa minbegen halyq joq, bári derlik óre túregeldi. Olar  mınıstrge renishterin bildirip, alyp jatqan járdemaqylarynyń mólsherin mysalǵa keltiridi. Áleýmettik jeli qoldanýshysy 5 balanyń anasy Aqmaral Basırova 2009 jyldan beri memlekettiń bergen járdemaqysyn táptishtep sanap, sonyń bárin mınıstrdiń ózine qaıtarmaq. Aqmaral Basırovanyń Facebook-tegi jazbasy tómendegideı:

«Kópbalaly ana retinde mynany aıtaıyn: álgi Eńbek jáne áleýmettik qorǵaý mınıstri Ábilqasymova qatty qatelesip otyr nemese ózge ǵalamsharda ómir súretin sekildi me?! Qolyna bılik tıip, kókte samǵap júr-aý shamasy. Tipti óz elindegi kópbalaly ata-analardyń qalaı, qandaı jaǵdaıda ómir súretinin bilmeıdi de. Jerge túsińiz, Ábilqasymova hanym!

Ondaı otbasylarǵa memleket qalaı qamqorlyq jasap jatqanyn jaqsy bilemin.

5 balany dúnıege ákelip, ósirip otyrǵan men 10 000 tgeńge alatynmyn. Iaǵnı, ár balama shaqqanda 2000 teńge.

2018 jyldyń shildesinde járdemaqyny alyp tastapty, jeke kompanıam baryn kórgen bolý kerek.

Alaıda buǵan qabaq shytqan men joq. 10 000 teńge alyp, baıyp ketken joqpyn nemese almaı kedeılenip ketpedim. Alaıda tipti bir nan men sútke aqsha tappaı qalǵan sátter bolýshy edi, ondaıda memlekettiń bergen tıyn-tebeni kómektesetin. Jaraıdy, bizdi qoıshy, aýyl aımaqtardaǵy kóp balaly analardyń háli ne bolyp jatyr? Bul suraq Mádına Ábilqasymovany tym bolmaǵanda bir ret alańdatty ma eken? Olardyń qandaı jaǵdaıda ómir súrip jatqandaryn óz basym jaqsy bilemin. Ábilqasymova hanym, menimen birge aýyl men aýdandardy aralap shyǵýǵa qalaı qaraısyz? Kózińizdi ashaıyn!

Tek «týsańdar, ózderiń úshin, memleket senderge mindetti emes» dep aıtýdyń qajeti joq. Al eger sol kópbalaly otbasynan shyqqan bir balaqaı chempıon bolyp, qazaqtyń atyn shyǵarsa, aınalyp-tolǵanyp ketesińder ǵoı.

«Bul bizdiń Qazaqstannyń azamaty! Jaraısyń!» degen qur maqtaýdan aýyzdaryńyz bosamaı jatady.

Quddy bir memleketimizge jeńis syılaǵan balaǵa ózderińiz qoraptap altyn bergendeı... Syılamaısyzdar, ásirese, analardy qurmettemeısizder! Sizder kópbalaly analarǵa «týyp alyp, balasyn baǵa almaı otyrǵan bir beıbaq» dep qaraısyzdar.

Uıat! Masqara!» - dep jazǵan ana kelesi kúni-aq memleketten alǵan járdemaqy kólemin shyǵaryp berdi. Maqsaty – sonyń bárin memleketke qaıtaryp berý!

«2009 jyly dúnıege tórtinshi balam – Sultan keldi de, men kópbalaly ana atanyp shyǵa keldim.

Sol sátten bastap aı saıyn járdemaqy alyp turdym. Ár aıdyń 5-i kartochkama aqsha túsetin.

2011 jyly dúnıege Káýsar atty tátti qyz alyp keldim.

Al endi 2009 jyldan bastap memleketten alǵan járdemaqy mólsherin sanap bereıin sizderge.

2009 jyly tórt balam úshin – 5472 tg = jylyna 60 660 tg;

2010 jyly – 5940 tg = 66 132 tg;

2011 jyly bes balam úshin – 6006 tg = 72 072 tg;

2012 jyly – 6428 tg = 77 136 tg;

2013 jyly – 6876 = 82 512 tg;

2014 jyly – 8246 tg = 98 952 tg;

2015 jyly – 8705 tg = 104 460 tg;

2016 jyly – 8824 tg = 105 888 tg;

2017 jyly – 9440 tg = 113 280 tg;

2018 jyly – 10 005 tg = maýsymnan bastap toqtaǵanyna baılanysty jalpy 60 030 tg alyppyn.

Sonymen baılyǵy tasyp turǵan memleketime men, kópbalaly ana 841 112 teńge qaryzbyn. Ári sol qaryzdy Mádına Ábilqasymovaǵa qaıtaryp beretinimdi ashyq túrde jáne maqtanyshpen málimdeımin. Ol 1 000 000 tg aılyǵyn azdyq etetin sekildi».