Kásipqoı boksta tórt ret qana aıqasqa túsken Jánibek Álimhanuly óziniń ınstagramdaǵy paraqshasynda dúnıe júzi boıynsha orta salmaqtaǵy eń myqty úsh boksshyǵa ses kórsetti. Endi Jánibek baýyrdyń sózine nazar salaıyq: «Qalaısyńdar, chempıondar? Utylyp qalmańdar. Jaqynda árqaısyńnan óz belbeýimdi alamyn. Qazir sender meni tek ınstagramnan ǵana kórip otyrsyńdar. Jaqynda rıngte betpe-bet júzdesemiz. Senderge qazaq boks stılin kórsetemin. Ol jekpe-jek ómirlerińdegi esten ketpes jekpe-jek bolady, senińder». Jánibek judyryǵyn bilep otyrǵan sańlaqtar túrli versıalar boıynsha dúnıe júziniń chempıondary: Saýl Alvares, Denıel Djeıkobs, Demetrıýs Andrade.
Meksıkalyq Saýl Alvares byltyr Gennadıı Golovkındi jeńgen surapyl boksshy. WBA, WBA, WBO versıalary boıynsha dúnıe júziniń birneshe dúrkin chempıony. Jasy 28-de. 2013 jyly Floıd Meıvezermen qolǵap túıistirgen Saýldyń boks álemindegi bedeli óte joǵary. Saýl Alvarestiń kásipqoı boksqa den qoıǵanyna 13 jyldan asty.Saýl jaqynda DAZN onlaın-strımıng kompanıasymen 5 jylǵa 365 mln. dollarlyq kelisim jasady. Bul álemdik sport tarıhyndaǵy eń oljaly saýda deıdi biletinder. Osyndaı soıqan boksshyny jekpe-jekke shaqyryp otyrǵan bizdiń Jánibek júrek jutqan batyrdyń naǵyz ózi-aý.
Al amerıkalyq Denıel Djeıkobs 29 qarsylasyn nokaýtqa túsirgen dúleıdiń ózi. Denıel áýesqoı boksta 144 ret sharshyǵa túsip, ábden ysylyp baryp kásipqoı bokstyń tabaldyryǵyn attady. IBF, WBA versıalary boıynsha birneshe ret álem chempıony. Jaqynda 32-ge tolady. Ol 2017 jyly Gennadıı Golovkınnen upaı aıyrmasymen utyldy. Biraq báseke sońynan qazylar sheshimimen kelispeı, eki upaı artyqshylyǵymen Golovkındi uttym dep málimdedi. Denıel orta salmaqtaǵy eń bir soqqysy zilbatpan boksshynyń biri.
Amerıkalyq Demetrıýs Andrade áýesqoı bokstan 2007 jylǵy álem chempıony. Kásipqoı rıngte on jyl boıy jan balasynan jeńilip kórgen joq. 27 aıqastyń 17-sinde qarsylastaryn eseńgiretip utypty. Demetrıýs Andrade aldaǵy aqpannyń sońynda 31-ge tolady. WBA,WBO versıalary boıynsha dúnıe júziniń birneshe márte chempıony.
Bizdiń batyr osyndaı jigittermen judyryqtasýǵa asyǵyp júr eken. Quptaımyz. Tilektespiz. Boks dúnıesinde Muhammed Álı, Maık Taıson, Floıd Meıvezer, Mennı Pakáo deńgeıinde bir qazaqtyń atoı salǵanyn biz de arman qylamyz. Biraq bul jalǵanda adam balasynyń nyǵmeti Allanyń qolynda ekenin bir sát esten shyǵarýǵa bolmaıdy. Jánibektiń qasynda Berik Sultan sekildi ımandy, tárbıeli azamat bar. Sondyqtan Jaratqan Ie áli násip ete qoımaǵan belbeýdi «alamyn» degennen góri, Jánibektiń: «buıyrtsa, alamyn» degeni durys bolar edi. Óıtkeni, biz álsiz pendemiz. Bir mınýttan keıin basymyzda qandaı jaǵdaı bolatyny bizge belgisiz.
«Meniń salmaǵymnyń chempıondary ǵoı. Buıyrtsa, kóp kúttirmeımin. Ózimniń de kóp kútkim kelmeıdi. Lomachenkodan qazaq boksshylarynyń esh jeri kem emes. Biz de qysqa ýaqytta chempıondarmen judyryqtasa alamyz. Buıyrtsa, az qaldy! Eń bastysy, senim jáne tynbaı jattyǵý qajet!» Iá, Jánibek osylaı deıdi. Alla Taǵala seni til-kózden, kóldeneń qyrsyqtan saqtasyn, Jánibek baýyr! Búkil alash jurty tileýlesiń ekenin bir sát esińnen shyǵarma!
Esterińizge sala keteıik, Jánibek Álimhanuly 25 jasta. Áýesqoı bokstan 2013 jylǵy álem jáne Azıa chempıony. 2014 jylǵy Azıa oıyndarynyń jeńimpazy. Jánibek qazir álemge áıgili boks bapkeri, amerıkalyq Djeıms Makgırttiń qol astynda jattyǵyp júr. Makgırt 15-ten asa dúnıe júzi chempıonyn baptaýǵa atsalysqan óte bilikti maman.
Qydyrbek Rysbek
