Sheshenstan Respýblıkasy Ulttyq saıasat mınıstrliginiń basshysy Janbolat Ýmarov keshe sóz sóılep, «buzaqylyq jasaǵan azamattar eldiń telearnasy arqyly halyqtan keshirim suraý kerek» dep málimdedi. Ol úshin aldaǵy ýaqytta telearnadan arnaıy aıdar ashylmaq. Ol qalaı atalady, ol jaǵy áli ashyp aıtylǵan joq.

Al munyń sebebi nede? Janbolat Ýmarovtyń aıtýyna qaraǵanda, qazirgi kezeńde ınternet, áleýmettik jeli arqyly jalǵan málimetter taratyp, halyqty ábigerge salyp jatqandar azaımaı otyr. Tipti ótkende káriz qubyrlary arqyly sýdyń ýlanǵany týraly aqparat tarap, halyq ábigerge tústi. Sheshenstanda mundaı buzaqylyq, alaıaqtyq sıpatta jasalynatyn oqıǵalar óte kóp. Sondyqtan da munyń aldyn alý kerek. Halyqty ábigerge salatyn mundaı buzaqylardy tabý qıyn emes. Jazasyn alyp, aıyppulyn tóler, biraq aldymen eldiń aldyna shyǵyp, keshirim suraýy tıis. Árıne, buzyqty ortalyq alańǵa ákep keshirim suratýǵa bolar, biraq bul órkenıetti jol emes. Sondyqtan jalpy jurtqa zıan keltirgen oqıǵa týraly el habardar bolǵany jón. Ol úshin ony jasaǵan adam óziniń jaǵymsyz isine uıalyp, keshirim suraýy tıis. Al onyń eń durys joly telerna arqyly halyqtan keshirim suraý, budan bylaı ony jasamaýǵa ýáde berý. Sondaı-aq jalǵan aqparat taratqan azamattyń sýreti jarıalanyp, tártip buzýshy gazet oqyrmandarynan da keshirim suraıdy.

Alaıda Sheshenstan Respýblıkasy Ulttyq saıasat mınıstrliginiń basshysy Janbolat Ýmarov  «bul buzaqylyq áreketpen kúresýdiń tóte joly emes, degenmen ár adam qoǵamǵa, halyqqa zıan keltirip otyrǵanyn aldymen sezinip, osylaı uıalýy tıis» dep esepteıdi.

Osydan biraz ýaqyt buryn sheshen prezıdenti Ramzan Qadyrov qoǵamdyq kólikte úlken kisige oryn bermeı, ony balaǵattaǵan sheshen jigitin ózine shaqyryp alyp, telearnadan keshirim suratqany belgili. Endi mine atalǵan ádisti mınıstrler de qoldana bastady.