Birde áıelim meni qatty tańqaldyrdy. Otasqanymyzǵa 12 jyl bolǵanda jan jarym keshki asqa bir áıeldi shaqyrýymdy qalady. Keshki as, onymen qosa kınoǵa da aparýym kerek ekenin aıtty. Áıelim búı dedi: «Men seni súıemin, alaıda seni janyndaı súıetin ári senimen ýaqyt ótkizgisi keletin basqa da áıeldiń bar ekenin bilemin».
Áıelimniń aıtyp otyrǵany kim deısizder ǵoı? Men umytqan, jo-joq umytpaǵan, tek ýaqyt tappaı júrgen, joq, bul da syltaý, durysy – baǵalaı almaǵan, alaıda meni bir sátte esinen shyǵarmaıtyn anam edi. Bıyl anamnyń kúıeýinen aıyrylǵanyna 19 jyl boldy. Men shańyraq kótergeli, bólek úı bolǵaly anam jalǵyz qaldy. 19 jyl boıy jalǵyz boldy. Sebebi men jumysbasty boldym, 3 balam bar, ýaqytymnyń basym kópshiligin solarǵa arnadym, anama sırek baratynmyn. Sol bir keshte anama habarlasyp, keshki asqa shaqyrdym.
-Ne boldy? Jaǵdaıyń durys pa? – dep surady anam. Anama kesh habarlassaq, júregi bir orynda turmaıtyn edi, birden ýaıymdaı jóneletin. -Menimen ýaqyt ótkizgiń keletin shyǵar dep oıladym, - dep jaýap berdim men. Anam oılanyp qaldy da, birneshe sekýndtan soń «Muny qalaı qatty qalaıtynymdy bilseń ǵoı» dedi.
Jumanyń keshinde jumystan soń anamdy alyp ketýge bara jatyrmyn, sál qobaljýlymyn. Úıiniń janyna toqtaǵanymda qobaljyp turǵan anamdy kórdim.
Páltesin ıyǵyna jamylyp alǵan. Shashyn buıralap, ádemi kóılegin kıipti.
-Dostaryma «ulym meni kınoǵa, meıramhanaǵa aparady» dep maqtanyshpen aıtyp edim, maǵan qyzyǵyp qaldy, - dedi anam kóligime otyrar sátte.
Meıramhanaǵa keldik. Keremet bolmasa da, sondaı jaıly jer edi. Anam meni qoltyqtap alǵan, álemdegi birinshi hanymdaı sezinip kele jatyr ózin.
Ústelge otyrdyq, as mázirin anama ózim oqyp berdim. Sebebi, kózi usaq jazýlardy kórmeıtin edi. Oqyp jatyp, anama kózimniń qıyǵyn salyp bir qaradym. Maǵan kúlimdep, meıirimdi kózderin almaı qarap otyr eken.
-Seniń bala kúnińde as mázirin men oqyp berýshi edim, - dedi ol. – Iaǵnı, eńbegińizdiń óteletin kúni keldi, - dedim men.
Keshki as barysynda túrli taqyryptarda áńgimelestik. Eshqandaı ereksheligi joq. Tek sońǵy jańalyqtarymyzben bólistik. Áńgimege kirisip ketkenimiz sonsha kınoǵa keshigip qalyppyz.
Úıine aparǵanymda: «Ekeýmiz taǵy meıramhanaǵa baramyz, biraq ol kezde seni men shaqyramyn», - dedi, men kelistim.
-Kesh qalaı ótti? – dep surady áıelim.
-Óte jaqsy. Men oılaǵannan da keremet ótti, - dep jaýap qattym.
Birneshe kúnnen soń anam júrek talmasynan qaıtys boldy.
Bári aıaq astynan boldy, tipti anam úshin eshteńe istep úlgermeppin de. Birneshe kúnnen soń meıramhanadan shoty tólengen kvıtansıa keldi, janynda hat ta bar eken. Anamnan...
«Men ekeýmizdiń ekinshi keshki asymyzdyń aqshasyn aldyn ala tólep qoıdym. Biraq senimen birge tamaqtana alatynyma senimdi emespin. Degenmen, eki adam úshin tóledim. Áıeliń ekeýiń úshin. Sol kúngi kesh, ekeýmiz tamaqtanǵan, birge ýaqyt ótkizgen keshtiń men úshin qanshalyqty máni zor ekenin túsindire almaspyn. Men seni jaqsy kóremin, ulym», dep jazylǵan hatta.
...Ata-analaryńyzdy baǵalańyzdar! Bizdiń qýanyshymyzǵa shynaıy qýanyp, qıyndyǵymyzǵa shyn janashyrlyq tanytatyn – ata-analarymyz. Olarmen jıi ýaqyt ótkizińizder, janynda bolyńyzdar, jaqsy kóretinderińizdi jıi aıtyp júrińizder. Bári basqasha bolyp ketýi múmkin... Oılamaǵan kúni...
İzgi mahabbatpen, FAN.az
