Eńbek jáne halyqty áleýmettik qorǵaý vıse-mınıstri Svetlana Jaqypova úkimet otyrysynda Astanadaǵy bes balasynan aıyrylǵan otbasynyń turmysy tómen emes ekenin aıtty dep jazady Qamshy.kz aqparat agenttigi. 

"Ákimshiliktiń aqparaty boıynsha, bul otbasy turmysy tómen otbasynyń qataryna jatpaıdy. Otbasynyń kiris qarajaty jetkilikti bolǵan", deıdi vıse-mınıstr. 

Mınıstrdiń sózine súıensek, bes balanyń anasy eńbek kelisimsharty boıynsha, jas bosanǵan ana retinde qosymsha ýaqyt beriledi eken. Sondaı-aq bes balanyń anasy túngi aýysymǵa shyqpaýyna ruqsat etilgen. 

"Atalmysh otbasyǵa tótenshe jaǵdaı ókilderi eki ret kelgen. Otbasynyń jaǵdaıyn kórgen olar áleýmettik qorǵaý oryndaryna habarlasyp, mán-jaıdy aıtý kerek edi. Balalardyń ata-anasy bolsa, olar áleýmettik kómek suramaǵanyn aıtty", -deıdi vıse-mınıstr. 

Sondaı-aq vıse-mınıstr bes balasynan aıyrylǵan otbasy tıisti járdemaqyny alyp otyrǵanyn aıtyp ótti. 

Eske salsaq, 4-aqpanda Astana qalasynda úı órtenip,  bir otbasy bes birdeı balasynan aıyryldy. 

Usynǵan: Ásel Bolatqyzy