Sońǵy jyldary elimizde qyz-kelinshekterge arnalǵan trenıń kóptep ótkizilip keledi. Olardyń basty maqsaty – qazaq qyz-kelinshekteriniń psıhologıalyq turǵyda damýyna atsalysý. Qazirgi kúni Quralaı hanym, Kámshat Bekjigitova, Zarına Hantóre, Nazym Diltaıqyzy, Janar Baısemizova, Quralaı Qalıeva syndy tanymal psıhologtar bar. Bul hanymdar semnarlaryn Qazaqstannyń birneshe qalalarynda da ótkizip júr. Al tanymal aıtysker aqyn Aınur Tursynbaeva da ınstagram jelisi arqyly onlaın psıhologıalyq sabaq berip júr. Olar, "Kez-kelgen adam – psıholog. Sen oıyńdy ózgerte otyryp, ómirińdi de ózgerte alasyń " deıdi. "Kóp oqyp, kóp izdený arqyly adam baqytqa jete alady".
Osy rette Qamshy kz.aqparat agentiginiń tilshisi Quralaı hanymmen tildesken bolatyn.
"Eń alǵash men bir aqsha tabaıyn, kóptegen adamdardy jınap, semınar ótkizeıin degen joqpyn. Instagram paraqshama ózim biletin, ózime unaǵan, ózim nátıje shyǵarǵan keńesterdi jazyp júrdim. Sol keńesterim kóptegen qyz-kelinshekke kómek bolǵan sıaqty. Ádette rýhanı psıhologıa deımiz ǵoı, sol kishkentaıdan ájelerimizden estigen áńgimelerimiz ben sheteldiń psıhologtarynan alǵan bilimimdi ushtastyrdym. Bir kezderi kóptegen qyz-kelinshekter maǵan habarlasyp, kezdesý uıymdastyrýymdy suraı bastady. Sol kezden bastap Almaty qalasynda semınar ótkizdim. Sodan keıin, basqa qalalarǵa shaqyra bastady.
"Búgingi tańda qoǵamda psıhologtar kóbeıip ketti" degen pikirler qalyptasqan. Ol áleýmettik jelige baılanysty dep oılaımyn. Onyń barlyǵy eki-úsh jyldan keıin qalyptasyp, saralanady. Myqtylar qalyp, álsizder ketedi. Óziniń júreginen shyqpaǵan,tek aqsha úshin júrgen psıhologtar bolsa, olardy halyq ózi-aq saralaıdy. Keregin alady. Qazir qarasańyz, otbasynda er men áıel urysyp jatady. Adam balany tárbıelemes buryn ózin tárbıeleý kerek. Otbasyndaǵy urys-janjaldy kórip ósken balanyń bolashaǵyna psıhologıalyq turǵydan balta shabylady. Menińshe, qazirgi qoǵamǵa psıhologtar azdyq etedi. Sebebi 18 mıllıon adam turatyn memleketimizde bilim beretin kásibı psıhologtar kóp dep aıta almas edim.
Meniń bılet baǵalaryn qymbat qoıatyn sebebim, únemi semınarymdy qymbat jerlerde ótkizemin. Qyzdar baılyqtyń energıasyn jutyp, prezıdentterdiń ustaǵan tutqasyn ustasyn deımin. Úıde otyryp qalǵan qyzdar osyndaı keremet energetıkany sezinip kórsin deımin. Ózim eń alǵash ret Almatydaǵy Ankara qonaqúıine kelgende erekshe sezim bolǵan. Ol kezde aýylda turatyn edim. Sol kezde ishimnen tilek tiledim. Meniń balalarym osyndaı jerlerde júrsin dep armandadym. Sondaı nárseni qyzdarǵa kórsetkim keldi. Ózderińiz biletindeı, ol jerlerdiń shaıynyń ózi 3000-5000 tg. aralyǵynda. Ol jerde kofe-breık uıymdastyramyn. Beretin jumys dápterler taǵy da materıaldarym bar. Al basqa qalalarǵa shyǵatyn bolsaq, jol shyǵyny, jatyn ornymyz taǵy bar. Biraq men únemi qaıyrymdylyq jasaımyn. Múgedek analar men kópbalaly analarǵa tegin bılet taratamyn. Óz oqyrmandarymnyń arasynda da 30-40 bılet lotoreıa oınatamyn. Zal 500 adamǵa tolsa, onyń 200-300 adamy tegin keletinder. Sondyqtan ómirlerińizdi ózgertýden qoryqpańyzdar der edim", - dedi Quralaı hanym.
