Muhtar Shahanovtyń otty jyrlary, halyqqa qadirli qos saıasatkerdiń ólimi belsendiligin oıata almaǵan saıası boıkúıez jurtty ınternet oıatty. Jasy bar, jasamysy bar qazaq qaýymy áleýmettik jelidegi alǵashqy qadamyn jańbyrdan keıingi sańyraý qulaqtaı qaptap ketken juldyzdarǵa “laık” basýdan bastady. Kóp nazaryna ilingen sánqoı toptyń basqan-turǵanyn, “Ertegi ómirin” uzyndy kún áńgimege, qysyr keńeske arqaý etti. Ózderin aspanda júrgendeı sezinetin olar da osy qoǵamnyń bir múshesi emes pe?! Qatardaǵy pendeniń basyna túsetin taǵdyrdan shet qalmady. Ataqty prodúser Baıan hanym kúıeýinen ólimshi bolyp taıaq jep aýrýhanaǵa tústi. Baıan oqıǵasy qoǵamda erekshe dúmpý týdyrdy. Otbasylyq zorlyq-zombylyqtyń shyrqaý kórinisi retinde baǵalandy. El aýanyn shoý bıznesten áleýmettik máselege aýdardy.

Buryn bılikti synaý, qoǵamdyq pikir bildirý “opozısıa” qalpaǵyn kıgen sanaýly adamdardyń menshikti sharýasy bolsa, demokratıanyń jańasha formasy, erkin pikir alańy bolyp tabylatyn ınternet, áleýmettik jeli árkimdi “synshyl realıs” jazýshyǵa, qoǵamdyq belsendige aılandyrdy. Erkindik aıasyn keńeıtip, qoǵamdyq máselelerge aralasýǵa, bılik pen úkimettiń qyzmetin qadaǵalaýǵa, baǵalaýǵa múmkindik berdi. Toqtaýsyz aǵylǵan aqparattar aǵyny, ómirden oıyp alynǵan boıamasyz kórinister eshkimdi de beı jaı qaldyrmady. Sanada silkinis týdyryp, qoǵamǵa qalyptasqan daǵdyly kózqaraspen emes, alýan turǵyda, synı ári salystyrmaly pozısıamen qaraýǵa jeteledi.

Týaletten tabylǵan sharana men zorlanǵan balanyń taǵdyry, mektepterdegi toptyq tóbeles qoǵamnyń ón boıyndaǵy tolyp jatqan irińdi jaralar jurt talqysyna túsip, bılik organdaryna narazylyǵyn qozǵady. Áıgili sportshy Denıs Tenniń buzaqylar qolynan mert bolýy, otqa oranǵan vremánkamen birge órtengen kúnásiz bes sábıdiń tragedıasy qoǵam alańyn órshite tústi. Kóp balaly analar úkimet úıiniń aldyna jınaldy. Olardy bılikke dat aıtýǵa ıtermelegen qashqyn bankırdiń vıdeo ýaǵyzy emes, asty-ústi qazynaǵa toly keń baıtaq otanynan janǵa saıa baspana tappaı sendelgen kúıki tirligi, jaýtańdaǵan urpaǵynyń aldyndaǵy sharasyz haly edi.

Túıindeı aıtsaq, jalpy qoǵam tarıhta uly qaǵanattar qurǵan babalar rýhy men bolashaqtaǵy baqytty ómirdi baıandaıtyn uzaq merzimdik josparlardyń “Tamaq” bolmaıtynyn túsindi. Bıliktiń qaıta oılanatyn ýaqyty pisip jetildi

Esbol Úsenuly