Aqtóbege kelgen Úkimet toby kómek suramas buryn usynǵan jumysqa baryp, jumys isteýge keńes berdi. Sebebi, jumys istemeıtin adamnyń otbasy ataýly áleýmettik kómek te ala almaıdy, dep habarlaıdy Qamshy.kz aqparat agenttigi  QazAqparat saıtyna silteme jasap. 

Eńbek jáne halyqty áleýmettik qorǵaý mınıstri Berdibek Saparbaev kómek surap, úı alý kezinde qıyndyq kórgen otbasylardyń jaıyn jeke-jeke qaraýǵa ýáde etti.

Degenmen jumys istep, eńbek etýden qashatyn adamdardyń bar ekenin jasyrmady.

«Tańnyń atysy, kúnniń batysy jumys istep, otbasyn asyraý kerek. Ózim Almatyda páter jaldap turyp, Qarjy mınıstrliginde jumys istedim. Saǵat 18:00-den keıin júk tasýshy boldym. Kóbi solaı jumys istedi. Sondyqtan joldastaryńyzdy jumysqa jiberý kerek. Aýyrdy, densaýlyǵy joq dep qıyn jumystan qasha berse, úıinde jata beredi», - dedi Berdibek Saparbaev.

QR Premer-mınıstriniń orynbasary Gúlshara Ábdiqalyqova áleýmettik ataýly kómek alý úshin kez kelgen jumysqa ornalasýǵa keńes berdi. Sebebi, kem degende 40 myń teńge eńbekaqy alsa, balalarǵa járdemaqy alý múmkindigi qarastyrylǵan.

«Qaı aımaqqa barsam da, aldymnan jalǵyzbasty analar shyǵady. Qoǵamǵa ne bolǵan? Erkekter qorqaq bolyp ketken be? Problemanyń bárin áıelderge úıip qoıǵan ba? Sony túsinbedim», - dedi Gúlshara Ábdiqalyqova.

Eske salsaq, Úkimettiń jumys toby Aqtóbege kelip, jastarmen, kópbalaly analarmen kezdesý ótkizdi. Jıyn kezinde aqtóbelik kópbalaly, muqtaj otbasynyń analary turǵyn úı, jumyspen qamtý máselesin qozǵady. «Eń úlkeni - baspana máselesi. Elimizde 340 myń kópbalaly otbasy bar bolsa, onyń 28 myńnan astamy baspana kezeginde tur. Aqtóbe oblysyna turǵyn úı salýǵa 2,7 mıllıard teńge bólinedi. Jylyna 323 páter, 7 jylda 2153 páter salynady dep josparlanǵan», - dedi QR Indýstrıa jáne ınfraqurylymdyq damý mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetov. 

Usynǵan: Maqpal Sembaı