QR Halyq banki sheteldik qarjylyq ınstıtýttarmen básekelesýge nıetti. Bul týraly «Qazaqstan Halyq banki» AQ-nyń basqarma basshysy Úmit Shaıahmetova aıtty, dep habarlaıdy Qamshy.kz aqparat agenttigi.

«2019 jyly  Halyq banktiń aldynda úlken mindet, úlken maqsat tur – naryqta, jergilikti oıynshylarmen ári sheteldik qarjylyq ınstıtýttarmen tıimdi básekelesýge qaýqarly bolýymyz tıis. Bárimizge belgili, 2020 jyly Qazaqstan Dúnıejúzilik saýda uıymyna kiredi», - dedi Úmit Shaıahmetova baspasóz máslıhaty barysynda.

Onyń sózinshe, básekeles bolýdyń artyqshylyǵy – Halyq banki valútalyq nesıelerin tómengi paıyzben bere alatyn bolady. Bul arzan qarjylandyrýdyń arqasynda júzege aspaq.
Qazaqstandaǵy jeke tulǵalardyń dollarlyq depozıtteri boıynsha paıyzdyq mólsherlemeler 1% -dan aspaıdy.

2019 jylǵa qatysty Halyq bankiniń aldynda turǵan kelesi jospar – sáýirde Ózbekstanda enshiles bank ashýǵa lısenzıa alý. Mundaı jospardy 2018 jyly Qazaqstan qor bırjasy da aıtqan bolatyn. Al Úmit Shaıahmetova prosestiń qalaı júzege asatyny jaıly tolyǵyraq baıandady.

«Sáýirde Halyqtyń enshiles bankin Ózbekstanda ashýǵa tolyq lısenzıany kútip júrmiz. Bank ashý úshin ǵımarat daıyn tur. Bul bizdiń bankti tanytatyn altynshy memleket bolmaq. Aldymen biz zańdy jáne jeke tulǵalarǵa qyzmet usynyp, jyl sońynda júzege asyramyz dep josparlap otyrmyz», - dedi «Qazaqstan Halyq banki» AQ-nyń basqarma basshysy.

Eger jospar sátti júzege assa, Halyq bank Ózbekstanda enshiles banki bar alǵashqy qazaqstandyq bank bolmaq. Qazirgi ýaqytta bank fılıaldary Reseıde, Qyrǵyzstanda, Grýzıa, Tájikstanda ornalasqan.  Bank búginde 10 mıllıon adamǵa qyzmet etýde.

Jalpy, 2018 jyldyń 12 aıynda «Qazaqstan Halyq Banki» AQ-nyń taza kirisi 2017 jyldyń osyndaı merzimdegi 173,362 mlrd teńgeden negizinen paıyzdyq jáne komısıalyq kirister ósý esebinen 46,7 paıyzǵa 254,238 mlrd deıin ulǵaıdy.

2018 jyldyń qorytyndysyna sáıkes, taza paıyzdyq marja 2017 jylǵy 4,9 paıyzdan jyldyǵy 5,1 paıyzǵa deıin ósti.

Aktıvter 2018 jyldyń tolyq 12 aıynda 1,1 paıyzǵa ósip, 8,9 mıllıon teńgeni qurady.

2017-2018 jyldary Halyq banktiń basty atqarǵan mindeti – Qazkom men Hakyk bankterin biriktirý boldy. Búginde Halyq jáne Qazkom naryqtyń úshten bir bóliginen artyq úleske ıe.