Eı, Alataý, eı, Alataý... Alataý deımin! Alataý-aý, sál alasarshy? Sál ǵana tómendeshi? Jete alar emespin saǵan... Aıtarym bar! Alataý, syrlasaıyqshy? Adamdar menen sharshaǵan sıaqty. Jalyqtyrǵanmyn-aý bárin shamasy...

Alataý, senen mıllıon ese kip-kishkentaı mynaý meniń ózimniń jan-dúnıemdi jaryp, ón boıymdy joq qylarlyq muńym, qaıǵym, qýanyshym bir basyma jeterlik. Jaratqan adamǵa kótere almas synaq bermeıdi deıdi. Degenmen de, keıde júregim jarylardaı aýyryp, búkil denemdi bir nárse órtep jiberedi! Kishkentaı synaqqa shydamaı, ózimdi quzdan laqtyrǵym keletin sátte seni oılaımyn!

Alataý, netken asqarsyń! Sendeı bolsam, mynaý qaıǵy-cymaq dúnıeler túk te bolmaı qalar edi! Sen de kórgeniń men baýyryńa kelip muńyn shaqqan pendelerdiń syryn, sonsha myńjyldyq qupıańa shydaı almaı jarylsań, ne bolmaq?!

Men ol... men kip kishkentaı, bar-joǵy mańyzdy emes júrgen bireýmin ǵoı. Áldebir kúni jarylyp ketsem de, Almatyny armansyz aralap, baqtarynda qydyrǵan, kók aspanyn kórip qýanyp, Medeýiniń muzyn súıip, Kóktóbesin talaı asqan, kóshelerin kezip ótken, bolyp – bolmaǵany de beımálim, eshkimge de qyzyqsyz bireý keýdesine syımaǵan tynymsyz ýaıym men mıyn jegen sansyz oılardan ketti der. Ketti der de, eki-úsh kún aza tutyp qoıa salar.

Al, sen! Al, sen jarylsań... Jo-joq! Eshqashan! Sen olaı etpe, Alataý, jaraı ma? Áıtpese, orynyń oıylyp, mynaý Almatym qorǵansyz qalady! Sen, sen solaı tura ber, jaraı ma?! Qansha azaptanyp, qansha qamyqsań da, sen solaı tura bershi? Áli talaı tarıhtyń kýási bolyp, talaıdy ótkerýiń kerek qoı! Qabaǵyńa qar jaýyp, baýyryńda gúl jaınap, janaryńnan jas tamyp, aspanyńda kún jarqyrap... tura ber solaı. Sen solaı ádemisiń! Sen solaı ereksiń! Sen qazaqqa kereksiń!...

Alataý, sen rasynda asqarsyń! Keıde, bilesiń be... keıde men sen bolǵym keledi...

Alataý, etegińde tynyǵyp, keýdeńe basymdy qoıyp, myzǵyp alaıynshy... tym quryǵanda, kóleńkeńde saıalaıynshy?... Bir sát qana...

Maqpal Sembaı