AQSH prezıdenti Donald Tramp aqyry aıtqanyn istete bastady. Ol óziniń saılaýaldy kampanıasynda AQSH pen Meksıka arasyndaǵy shekaraǵa qabyrǵa turǵyzýǵa ýáde bergen. Endi mine Tramptyń jobasy iske asa bastaǵan syńaıly.

Árıne, AQSH prezıdentiniń jobasy qatty qarsylyqqa ushyraǵany belgili. Óıtkeni oǵan orasan zor qarjy kerek.  Aıta keter bir jaıt, atalǵan qabyrǵa Bıll Klıntonnyń prezıdenttik basqarýy tusynda turǵyzyla bastaǵan. Biraq joba aıaqtalmaı qalǵan. Barak Obama da bul jorbaǵa sonshalyqty mán bergen joq. Alaı munyń qanshalyqty qajeti bar? Donald Tramp ákimshiliginiń aıtýyna qaraǵanda, AQSH-qa búkil esirtki men zańsyz mıgranttar shekara arqyly enýde. Ony toqtatý úshin eki el arasynda shekara turǵyzylýy kerek. Tipti bul jobany júzege asyrýǵa kishi Djordj Býshtyń ózi qol qoıǵan. Endi Bıll Klınton men Barak Obama  júzege asyra almaǵan qabyrǵany  birtindep Tramp turǵyzyp jatyr. Biraq ol qatty qarsylyqqa tap boldy.

Aıta keter bir jaıt, osy ýaqytqa deıin Meksıka men AQSH shekarasy arasynda 1078 shaqyrymǵa qabyrǵa turǵyzyldy. Endi Tramp taǵy 1600 shaqyrym jerge qabyrǵa turǵyzýdy kózdep otyr. Al oǵan shammen 6 mıllıard dollardaı qarjy kerek. Keshe atalǵan jobany júzege asyrýǵa baılanysty Pentagon 1 mıllıard dollar qarjy bóldi. Dál osy «Meksıka qabyrǵasyna» baılanysty Aq úı men Senat arasynda teketires órshidi. Sonyń saldarynan birqatar memlekettik mekemelerge qarjy bólý toqtatyldy, naqty aıtqanda shatdaýn paıda boldy.

Aqpan aıynyń ortasynda Donald Tramp qalyptasqan jaǵdaıǵa qatysty shekaralyq eldimekenderde tótenshe jaǵdaı jarıalady. Endi túıin azdap sheshile bastaǵandaı.

Al Pentagon bólgen 1 mıllıard dollar ázirge 91 shaqyrymdyq  qabyrǵa turǵyzýǵa, sonymen, qatar sol mańaıdaǵy eldimekenderge jol salyp, kóshelerdi jaryqtandyrýǵa jumsalatyn kórinedi.