RBK anyqtaǵan shyǵarmalary eń kóp satylǵan Nobel syılyǵyn ıelengen taǵy bir jazýshy – Djon Steınbek. Ol 1962 jyly ádebıet salasyndaǵy Nobel syılyǵyn ıelendi. Shved akademıasy bul syılyqty oǵan «Jeńil ázilmen jáne ashshy áleýmettik kózqaraspen úılesetin realısik jáne aqyndyq qabileti úshin» berdi. Steınbektiń qalamynan shyqqan eń áıgili romandary – «Ashý shoǵyry», «Jumaqtyń shyǵysyna qaraı», «Adamdar men tyshqandar». Barnes &
Noble amerıkalyq dúken júıesi boıynsha atalǵan týyndylardyń bári de eń kóp oqylatyn bestsellerlerdiń qataryna jatady. Bir qyzyǵy Steınbek bul syılyqqa segiz ret usynylyp, 1962 jyly ony ázer aldy. Talaı márte báıgeden aty ozbaı kelgende, jazýshy óziniń Nobel syılyǵyna laıyq emes ekenin aıtqan bolatyn. Ádebıet salasyndaǵy álemdegi eń joǵary marapattyń Djon Steınbekke berilgeni AQSH synshylarynyń qatty narazylyǵyn týǵyzdy. Sol jyldary jaryq kórgen AQSH-tyń ádebı basylymdarynda sońǵy ýaqyttary jazýshynyń qalamynan shyqqan romandarynyń óte álsiz týyndylar ekeni kóp aıtyldy. Synshylardyń kúmán keltirýinde shyndyq bar edi. 2013 jyly sol kezdegi Shved akademıasy qujattarynyń qupıasy ashylǵanda (zań boıynsha ol qujattar 50 jyl qupıada ustalady) – amerıkandyq ádebıettiń moıyndalǵan klassıgi – Djon Steınbektiń úmitkerler qataryndaǵy, «eń nashar toptyń ishindegi úzdigi» bolǵany úshin Nobel syılyǵyn alǵany anyqtalady. Jazýshynyń «Ashý shoǵyry» romanynyń alǵashqy basylymy sýretpen bezendirilip 50 myń danamen jaryq kórip, 2,75 dollar turdy. 1939 jyly bul shyǵarma bestsellerge aınalyp, 75 mln kitap kóshirmesi satyldy. Búgingi tańda jaqsy kúıde saqtalyp qalǵan romannyń eń alǵashqy basylymnyń quny 24 myń dollardan asady (Jalǵasy bar).Amangeldi Keńshilik, facebook
