Resmı málimet boıynsha Qostanaı, Aqmola jáne Aqtóbe oblystarynda qyrylǵan bókenderdiń sany 85 000nan asqan. Resmı organdar bókenniń qyrylýy pasterellez aýrýynyń saldarynan dep otyr. Alaıda qyrylǵan bókenderden bul aýrýdyń belgileri baıqalmaıdy deıdi keıbir mamandar.

Sonymen birge aýyl turǵyndary bókenderdiń ǵana emes, sýdaǵy baqalardyń, maldyń ólip jatqany týraly habarlaýda.

Qostanaı oblysynda eń kóp kıik qyrylǵan (40 000nan asa) aýmaqtan ǵarysh zymyrany bólshegine uqsaıtyn shar tárizdes temir zat tabyldy dep habarlaıdy Qostanaı oblystyq prokýratýrasynyń mamandary. Kıikter qyrǵynyna geptıldiń qatysy bolýy ábden múmkin. Osy jyldyń 16-mamyry kúni Baıqońyrdan ushqan reseıdiń Proton zymyrany jerden kóterilgen soń 500 sekýnttan keıin apatqa ushyrady.

Al QR Aýyl sharýashylyq mınıstrliginiń resmı aqparaty boıynsha 17-mamyr kúni, ıaǵnı zymyran qulaǵannyń ertesi Betpaqdaladaǵy "Yrǵyz-torǵaı" tabıǵı rezervatynda alǵashqy 4 kıiktiń óligi tabylǵan.

Kıikter ólimine Protonnyń sebebi bolýy múmkin ekenin Marǵulan Seısenbaev bylaı túsindiredi: «Protonnyń ushý baǵyty zymyrandy ushyrý alańy ornalasqan Tóretam beketinen bastalyp, odan ári Qoskól beketiniń batysynan Biráli aýa raıyn zertteý beketin basyp ótip, Arqalyq qalasynyń ońtústik-shyǵysyn basyp ótip, Aqmola oblysynyń ońtústik shetinen ári qaraı Qaraǵandy oblysynyń soltústiginen ári qaraı Altaı aımaǵyna, zabaıkalıe taǵy basqa aýmaqty basyp ótedi. GoogleMap arqyly qarasańyzdar jáne Biráli beketin tabyńyzdar. Sol jerden batysqa qaraı 70-80 shaqyrym jerde Úrpek qystaǵy ornalasqan. Bul úlken kıikter tóldeıtin aýmaq. Qarasańyzdar dál sol jerde Aqtóbe, Qostanaı, Qaraǵandy jáne Qyzylorda oblystarynyń shendesetinin baıqaısyzdar. Bul kıikterdiń jappaı qyrylǵan ortalyǵy. Osynda kóp kıikti «Proton» arqyly ýlaý úshin geptıldi búkil Qazaqstan aýmaǵyna shashý qajet emes. Odan ári troektorıa boıynsha azdaǵan kıik ólgen Aqmola oblysy jatyr».

Qaraǵandy oblysynyń turǵyndarynyń málimdeýi boıynsha kıikterdiń jappaı qyrylýyna Qaraǵandy oblysy Balqash kóliniń batysy men Betpaqdala aýmaǵyn qamtyp jatqan Saryshaǵan áskerı- jattyǵý polıgonynda jasalǵan synaqtyń sebebi bolýy múmkin.

Osy jaǵdaılarǵa qarap, 85 000 kıiktiń qyrylýyna «Proton» zymyranynyń qulaýy nemese Aqtóbe oblysynda jáne Qaraǵandy oblysyndaǵy Betpaqdalada ornalasqan Reseıdiń áskerı-jattyǵý polıgonynyń áseri bolýy ábden múmkin dep oılaımyz.

Sol sebepti, «Baıqońyr» ǵarysh aılaǵynan «Proton» zymyranyn ushyrýdy tez arada, úzildi-kesildi toqtatýdy jáne elimizdegi Reseı federasıasynyń áskerı-jattyǵý polıgonyn shuǵyl jabýdy talap etemiz.

«Antıgeptıl» ekologıalyq azamattyq qozǵalysynyń músheleri jáne qazaqstandyq azamattar...