Júkti áıelderge beriledi degen 425 myń teńgeni alýdyń óz talaptary bar. Densaýlyq saqtaý mınıstrligindegiler bul qarajat barlyq júkti áıeldiń qolyna ustatylmaıtynyn málimdedi dep jazady Qamshy.kz aqparat agenttigi Evrazıa arnasynyń deregin negizge alyp.
Sońǵy kezderi kóptiń kóńilin eleńdetken jańa bastama qashan júzege asyrylady? Qomaqty qarajat alýǵa asyqqan bolashaq analar neni bilýi tıis?
Mamandardyń dereginshe, elimizde júkti bolatyn áıelderdiń 30 paıyzynyń ǵana densaýlyǵynda kinárat joq. Al qalǵandary túrli patologıamen aýrýhanaǵa jatyp, em-dom qabyldaýǵa májbúr eken. Óıtkeni, kóbisinde aýyr ekstragenıtaldy jáne de ózge ınfeksıalar anyqtalǵan eken.
«Ókinishke qaraı, qyz-kelinshekterdiń 80-70 paıyzyna jýyǵy júktilikti josparlamaıdy. Saldarynan túrli dertke shaldyǵady, odan bólek ishtegi sábı jetilmeı qalyp, túsik jasatýǵa týra keledi. Sondyqtan da júktilikti aldyn ala josparlaǵan jón. Aıaǵy aýyr áıelderden ózge de aýyr syrqattar kezdesip jatady», — deıdi gınekolog Juldyz Taıtelıeva.
Gınekologtar júkti áıelderdiń shamamen 50 paıyzǵa jýyǵy der kezinde tirkeýge turmaıtynyn aıtady. Odan bólek, keıde aı-kúni jaqyndaǵanda keletin arýlar jeterlik. Al mundaı nemquraılyq bolashaq sábıdi túrli dertten aldyn alý múmkindigin shekteıdi deıdi. Sondyqtan da mınıstrlik áıelderdi ákimshilik jaýapqa tartý máselesin de qarastyrýda.
«Bul usynystyń negizgi maqsaty — ana men balanyń densaýlyǵyn jaqsartý. Búginde ýaqytyly tirkeýge turmaıtyn júkti kelinshekter kóp. Atap aıtsaq, olardy der kezinde esepke turýǵa yntalandyrǵymyz keledi. Sondaı-aq, dárigerge qaralmaıtyn, ekpeden bas tartatyndar úshin ákimshilik jaýapkershilik engizýdi usyndyq», — dedi QR Densaýlyq saqtaý mınıstri Eljan Birtanov
Mádına Nurlan júktliktiń 8-9 aptasynda emhanaǵa baryp tirkeýge turǵan. Onyń aıtýynsha, kez-kelgen bolashaq ana júktilikke asa muqıat bolǵany abzal. Sondyqtan da mınıstr usynǵan bir rettik tólemdi oılapǵannan góri, áıelder óz densaýlyqtaryna alańdaǵan jón dep esepteıdi.
«Jalpy bul suraq kóptegen qyz-kelinshekterdi oılandyrýda. Sebebi bul qarajatqa kim qol jetkizedi degen suraq týyndaıdy. 425 myń teńgeni meniń oıymsha, óziniń ómirine, ishindegi balasyna úlken jaýapkershilikpen qaraıtyn anaǵa berý kerek dep oılaımyn», — dedi turǵyn Mádına Nurlan.
Osylaısha, mınıstrlik júkti qyz-kelinshekterdiń densaýlyǵyna qatysty jaýapkershiligin artpaq. Iaǵnı, bir rettik járdemaqy engizbek. Shart boıynsha aıaǵy aýyr áıel júktiliginiń 3 aıyna deıin jergilikti emhanaǵa tirkelýi tıis. Odan qalsa, ýaqytyly dárigerge qaralyp, analızderin ótkizýi qajet. Sonda ǵana bir rettik kómekten úmitti bola alady.
Osylaısha júkti kelinshekterdi yntalandyrý úshin 425 myń teńgeden tóleý kerek degen qujat parlamentke maýsym aıynda ǵana jetpek. Ázirge bul usynys tek qoǵam talqysyna salynady. Bir rettik kómektiń qalaı tólenetini de belgisiz. Sondyqtan da bolashaq analarǵa qomaqty qarjydan dámetý ázirge erterek. Sheshim depýtattardyń qolynda.
Usynǵan: Ásel Bolatqyzy
