Múgedek bop dúnıege kelgen jas jigittiń áni áleýmettik jeli qoldanýshylarynyń kózine jas uıalatty dep habarlaıdy Qamshy.kz aqparat agenttigi.
Ol jigit týraly bloger Dáýlet Muqaev óziniń Instagram paraqshasynda jarıalady.
Jas jigittiń 20 jastaǵy Nyshanbaı Ońǵarbaı ekenin tanystyra kele bloger "Eki qol, bir aıaǵy joq bolyp dúnıe esigin ashqan, 1-shi toptaǵy múgedek. Shymkenttegi "Tasaryq" balalar úıinde tárbıelenip ósken. Búginde sol Shymqaladaǵy Nursat móltekaýdanynda páter jaldap turady" deı kele, "memleketten 56 myń kóleminde járdemaqy alady. Ókinishke qaraı, bul aqsha páter aqysynan artylmaıdy. Oǵan qosa, aıaǵyna kıiletin protezi de eskirgen" dep jazǵan.
Protezin jyl saıyn aýystyryp otyrý kerektigin de atap ótken bloger Nyshanbaıdyń sońǵy úsh jyl boıy bir protezben júrgenin, eskirgendikten aıaǵyn qysyp, qajaıtynyn alǵa tartqan. Buǵan da amal joqtyqtan shydap júrgen jas jigitke kómek qolyn sozaıyq dep barsha qazaq halqyna úndeý tastaǵan bloger: "Jaqsylyqtyń úlken-kishisi bolmaıdy, aǵaıyn! Kómek qolyn sozam deýshiler bolsa, tómende kórsetilgen telefonǵa xabarlasyńyzdar: 8-702-56-11-444" - dep jazbasynyń sońynda qajetti esepshot nómirlerin de qaldyrǵan.
Mundaı jaǵdaıǵa beı-jaı qaraı almaıtyn jeli qoldanýshylary jas jigitke jany ashyp jaqsy pikirlermen qoldaý bildirip, barynsha kómek qoldaryn sozýǵa daıyn ekenderin de jetkizgen eken.
Usynǵan: Maqpal Sembaı
Pikir qaldyrý