Áleýmettik jelide Konor Makgregordyń júrisin salyp, bir kúnde juldyzǵa aınalǵan balaqaıdyń esimi - Talant Álı Baqytjanuly. 5 jasar Talanttyń taekvondomen aınalysqanyna kóp bola qoıǵan joq dep habarlaıdy Qamshy.kz aqparat agenttigi.

«Men Qyzylorda qalasynyń turǵynymyn. Jasym – beste. Mektepke áli barǵan joqpyn. Sportpen aınalysqanyma jeti aı boldy. Úıdegi úsh balanyń úlkenimin. Menen keıin qaryndasym jáne inim bar. Ákem bolashaqta olardy da sportqa baýlyǵysy keledi», - deıdi Talant.

Talanttyń talantyn shyńdap, osy sport túrine kelýine sebepshi bolǵan ákesi eken. Ol: «Taekvondodan bólek erejesiz jekpe-jekpen aınalysyp júrmin. Oǵan da ákem úıretip, daıyndap jatyr. Sonymen qatar bos ýaqytymda shahmat, fýtbol oınaǵandy jaqsy kóremin», - deıdi.

Sportqa kelgenine az ýaqyt bolsa da, jarystan jeńispen oralýyna jaǵdaı jasap júrgen bapkerleri de joq emes. Olar – Gúlmyrza Májikov, Ákejan Ertaev jáne Erbol Beısenbaı syndy sport sheberleri.

«Qazirgi tańda men aptasyna úsh ret, eki saǵattan daıyndalamyn. Sportty jaqsy kórgendikten  taekvondomen aınalysý maǵan asa qıyndyq týdyrǵan joq», - deıdi Talant Álı.

"Konor Makgregordyń seniń beınejazbańdy óziniń paraqshasynda bóliskenin alǵash kimnen estidiń, kórgende qandaı sezimde boldyń?" degen saýalymyzǵa: «Men ol jańalyqty ákemnen estidim, ákeme aǵaılarym aıtqan eken. Jan-jaqtan tanystarymyz qońyraý shalyp, quttyqtap jatty. Men erekshe sezimde boldym», - dep  Talant qýanyshyn jasyrmady.

Onyń armany – Konormen kezdesý. Súıikti sportshysynyń ár qımylyn baqylap otyratynyn da jetkizdi.

«Konordy kórgim keledi. Jańa ǵana menen ákem «Konor shaqyrsa, barasyń ba?», - dep surady. "Men barmaımyn, biraq Konordy ózim Qazaqstanǵa shaqyramyn" dep jaýap qaıtardym», - deıdi 5 jasar taekvondoshy.

Talant Álı az ýaqyt ishinde kóptegen jarysqa qatysyp, júldeli oryndarmen qaıtqan. Onyń qanjyǵasynda halyqaralyq, oblystyq, aýdandyq jarystardyń 1-2 oryn júldeleri bar.

«Alǵa qoıǵan maqsatym – sportta belgili bir nátıjege jetip, Qazaqstandy álemge tanytqym keledi. Qazir sol armanyma jetý úshin sportpen barynsha aınalysyp, jattyǵýdan qalmaı daıyndalyp júrmin», - dedi Talant Álı.

Konor Makgregordyń  Instagram paraqshasynda jarıalanǵan Talant Álıdiń beınejazbasyn 11 mıllıonǵa jýyq adam tamashalaǵan. Álemge tanylyp úlgergen beınejazba Musahan Qalmahanovty eske alýǵa arnalǵan taekvondodan balalar men jasóspirimder arasyndaǵy halyqaralyq týrnırde túsirilgen eken. Talant Álı bul týrnırde 18 keli salmaq dárejesinde ekinshi oryn ıelengen.

Áńgimelesken: Marjan Sábet