Bul týraly Óńirlik komýnıkasıalar qyzmetiniń júrmeli brıfıńinde Mańǵystaý oblysynyń energetıka jáne turǵyn-úı komýnaldyq sharýashylyq basqarmasynyń basshysy Jandos Salımov málimdedi

«Qýaty 5 MVt quraıtyn keshenniń qurylysy barysynda 11 jumys orny ashyldy. Aldaǵy ýaqytta 20-dan astam jumys ornyn qurýǵa múmkindik bar»,-deıdi «BEST-Group NS» JSHS kompanıasynyń ókilderi.  Atalǵan kompanıa stansıa qurylysyn 2017 jyldyń kúz aıynda bastaǵan. Montaj-qurylys jumystaryn otandyq mamandar jasap, zaýyttyń týrbınalary halyqaralyq sapa standarttaryna sáıkes sertıfıkattalǵan.

«Mańǵystaý oblysynyń ákimdigi bizge Túpqaraǵan aýdanynan jer telimin berdi. «Damý» qorynyń kepildigimen biz sýbsıdıalanatyn mólsherlememen bankten nesıe aldyq. Jobany sheteldik kompanıalar ınvestısıalaýda. Atap aıtqanda, osy jobanyń seriktesteri men ınvestorlary amerıkandyq jáne reseılik kompanıalar - Lone Star Renewable Energy Corp (AQSH) jáne «Energotehservıs» JSHQ (Reseı). Jalpy jobany iske asyrýdaǵy basty maqsatymyz – jel elektr stansıalaryn paıdalaný arqyly negizgi energıa kózderin aýystyrý, Qazaqstandaǵy parnıktik gaz qaldyqtaryn azaıtý, sol arqyly klımattyń ózgerýi týraly BUU-nyń negizdemelik konvensıasyna sáıkes jumys jasaý. Endi bir aıdan soń biz óz ónimderimizdi sata bastaımyz. Ónimdi satyp alýshylar «Esepteý jáne qarjy ortalyǵy» JSHS bolmaq. Germanıa elinde jasalǵan qondyrǵylardyń arqasynda stansıa, jel qýatyn paıdalaný arqyly elektr energıasyn óndirip, oǵan qajettilikti tolyq óteıtin bolady. Aqshuqyr aýylynyń turǵyndaryna sondaı-aq aýyl mańyndaǵy óndiris oshaqtarymen jylyjaılarǵa elektr qýaty tapshylyǵyn joıady» - deıdi jobanyń damý jónindegi dırektory Gúlnar Ábıtova.

Mańǵystaý oblysynda jańartylatyn energıa kózderin damytý baǵytynda birneshe jobalar iske asyrylýda. 2018 jyldyń mamyr aıynan bastap Munaıly aýdany, Batyr selosynda qýaty 2 MVt kún elektr stansıasy iske qosyldy. Budan bólek Túpqaraǵan aýdany, Fort-SHevchenko qalasynda eki birdeı joba iske aspaq. Maýsym aıynda paıdalanýǵa beriletin 42 MVt kún elektr stansıasy men jyl sońynda iske qosylatyn 43 MVt jel elektr stansıasynyń  qurylys-montajdaý jumystary qarqyndy júrgizilýde. Sonymen qatar qazirgi tańda energetıka mınıstrligimen úsh jobany júzege asyrý boıynsha jumystar jasaqtalyp jatyr. Olar Beıneý aýdany, Beıneý aýylynda, Qaraqıa aýdany, Jetibaı aýylynda, Mańǵystaý aýdany, Shetpe aýylynda qýaty 10-15 MVt qamtıtyn jel jáne kún elektr stansıasynyń keshendi jumystarynyń jospary daıyndalýda» - dedi Mańǵystaý oblysynyń energetıka jáne turǵyn-úı komýnaldyq sharýashylyq basqarmasynyń basshysy Jandos Salımov

     «Jasyl ekonomıkany» damytýdyń basymdyqtarynyń biri jańartylatyn energıa kózderi bolyp tabylady. Memleket basshysy 2020 jylǵa deıin jańartylatyn energıa kózderiniń 3% -yn, 50 jylǵa qaraı 50% -yn qamtamasyz etýdi tapsyrdy. Bul óte aýqymdy mindet.