Mańǵystaý oblysynyń kásipkerler palatasyna qarasty Kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl Keńesi músheleri Jańaózen qalasynyń kásipkerlerimen kezdesti. Onda jeke kásipkerlerdiń ujymdyq aryzdary boıynsha Jańaózen qalasy ákimdiginiń tarapynan kásipkerlik maqsattaǵy jer ýchaskesine jeke menshik quqyǵyn berýden jáne jer ýchaskeleriniń paıdalaný merzimderin uzartýdan zańsyz bas tartýy jóndegi talaptary qaraldy.

Jıyndy MO kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl jónindegi Keńestiń tóraǵasy Shymbaı Sultanov ashyp berdi.

         Málimetterge júginsek, kásipkerler 2016 jyly Jańaózen qalasy ákimdiginiń jer ýchaskelerin tabystaǵanyn jáne onyń basym kópshiliginiń tolyq ıgerilgenin, alaıda, jer ýchaskesiniń paıdalaný merzimin uzartý, jeke meshik quqyǵyn berý týraly aryzdaryna Jańaózen qalasynyń ákimdigi prokýratýranyń usynysyn negizge alyp, zańsyz bas tartyp, áýre-sarsańǵa salý áreketteriniń bolǵanyn málimdedi.

Máselen, osy shahardyń kásipkeri B. Serıkbaev Mańǵystaý oblysynyń kásipkerler palatasynan óz quqyǵyn qorǵaýdy suraǵan edi. Rahat aýyly ákiminiń jer telimin paıdalaný merzimin uzartý týraly sheshimi qabyldanǵanyna qaramastan iskerdiń quqyǵy shektelip, kelisim-shartqa qol qoıylmaı otyrǵandyqtan jer qatynastary bóliminiń laýazym ıesine shara qoldaný týraly aryzy Mańǵystaý oblysynyń kásipkerler palatasynda qaraldy.

«Shyn máninde, Rahat aýyly ákiminiń 01.03.2019 jylǵy sheshimimen Rahat aýyly, «Aqsý» shaǵyn aýdany, Ó.Tájiǵalıev kóshesinen dúken jáne dóńgelek jóndeý sheberhanasynyń qurylysyn salý jáne paıdalaný úshin berilip, jalpy kólemi 0,0324 ga., jer ýchaskesiniń merziminiń aıaqtalýyna baılanysty, onyń paıdalaný merzimi 2 jylǵa uzartylǵan.Degenmen, Jańaózen qalalyq jer qatynastary bóliminiń laýazym ıeleri QR Jer kodeksiniń 43- baby 7- tarmaǵynyń talaptaryn óreskel buza otyryp, qaýly qabyldanǵan kúnnen bastap on jumys kúni ishinde kelisim-shart jasaqtamaı, prokýratýra organymen jerdi paıdalaný men qorǵalýyn qadaǵalaý basqarmasyna usynys berildi degen jalǵan syltaýmen, shart jasaqtamaı kelgen»,- deıdi kásipker.

Aryzda kórsetilgen ýájder boıynsha tıisti shara qabyldap, buzylǵan zańdy qalpyna keltirý týraly qala ákimine jáne prokýratýraǵa kásipkerler palatasymen hat joldanyp, kelissózder júrgizildi.

Onyń ústine, satyp alý-satý nemese ýaqytsha óteýli (óteýsiz) jer paıdalaný shartyn jasasý merzimderin buzǵany úshin, Jer qatynastary bóliminiń basshysyna QR Ákimshilik quqyq buzýshylyq týraly kodeksiniń 137- babynyń 1-tarmaǵynyń 15-tarmaqshasy boıynsha ákimshilik quqyq buzýshylyq óndirisin qozǵaý týraly Mańǵystaý oblysynyń jerdiń paıdalanýy men qorǵalýyn qadaǵalaý basqarmasyna usynys joldandy.

Memlekettik organdar tarapynan tıisti shara qabyldanbaǵandyqtan kásipkerler palatasy janyndaǵy kásipkerlerdiń quqyn qorǵaý jáne sybaılas jemqorlyqqa qarsy kúres Keńesiniń kóshpeli otyrysy uıymdastyrylyp, jer qatynastar bóliminiń basshysy qatelikterin tolyq moıyndady.

Osy oraıda, Keńes jumysyna qatysyp, túsinik bergen qala prokýrorynyń orynbasary da jer qatynastary bólimi basshysynyń jaýabyn joqqa shyǵaryp, zań talabyna saı sheshim qabyldaýdy talap etti.

Jańaózen qalalyq jer qatynastary bóliminiń basshysyM.Ýısenovtiń aıtýynsha, 2016 jyly 42 kásipkerge zańsyz jer ýchaskeleri tabystalǵan. Bul másele boıynsha 2018 jyly Jańaózen qalalyq prokýratýrasynyń usynysy kelgen. Sonyń negizinde kásipkerlerdiń aryzdary ýaqytsha toqtatylǵan. Jıynda óziniń zańsyz áreketin túsinip, B.Serıkbaevtyń jer paıdalaný shartyn jasaqtap bergenin jáne keńestiń hattamasy negizinde, jeke kásipker J.Torshaevanyń jer ýchaskesine jeke menshik quqyǵyn berýge jáne kásipkerlerdiń jer ýchaskeleriniń paıdalaný merzimderin zań sheńberinde uzartýǵa jumystanatynyn málimdedi.

         Kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl jónindegi Keńestiń hatshysy, óńirlik kásipkerler palatasy dırektorynyń orynbasary Á.Janaev: «Kásipkerler palatasynyń maqsaty - kásipkerlerdiń damýyna úlesin qosyp, ákimshilik kedergiler týyndaǵan jaǵdaıda kómek kórsetý ekenin túsindire otyryp, qoldanystaǵy zań talaptaryna sáıkes kásipkerlerdiń jer ýchaskeleriniń paıdalaný merzimderin uzartyp berý qajet ekenin, al egerde negizsiz bas tartý qaıtalanǵan jaǵdaıda jaýapty laýazymdy tulǵanyń zańbuzýshylyq áreketine quqyqtyq baǵa berý úshin tıisti quzyrly organdarǵa usynys jasalatynyn eskertemiz»,- dedi.

         Keńes sońynda Jańaózen qalasy ákimdiginiń tarapynan jiberilgen zań buzýshylyqtar aldaǵy ýaqytta oryn almaýy úshin oblys ákimine shara alý úshin aqparattyq hat joldanatyn boldy.