Qamshy.kz aqparat agenttiginiń jýrnalısi Ásel Bolatqyzy 27 maýsymda «Qazaq mektepterin kóbeıtip, jaqsy jaǵdaı jasaýǵa qaýqarymyz jetpeı me?» atty taqyryppen maqala jarıalady. Bul maqalada Qostanaı qalasynda qazaq mektepteriniń  sany az ekeni jazylǵan. Sondaı-aq bul maqalany «caravan.kz» jáne «365info.kz» saıttary orys tiline aýdaryp, "Qostanaı qalasynda jalǵyz qazaq mektebi jabylmaq" degen maǵynadaǵy taqyryppen jarıalapty. Maqala qoǵam arasynda shý týdyryp, Prezıdent Qasym-Jomart Kemeluly Bilim mınıstri men oblys ákimine Qostanaıdaǵy qazaq mektepterine qatysty máseleni sheshýdi tapsyrdy. Qostanaı qalasynyń ákimdigi osy másele boıynsha brıfıń ótkizip, maqalada aıtylǵan derektiń naqty emestigin habarlady.

Maqalada Qostanaı qalasyndaǵy mektep sany jónindegi statısıkalyq málimetten jáne keıipker aıtqan mekteptiń ataýynan qatelik ketken. Naqtylaıtyn bolsaq, keıipker №24  Syrbaı Máýlenov atyndaǵy mektep emes, bastaýysh synyptaryna arnalǵan №24 A mektebi jóninde aıtqan.

Qamshy.kz aqparat agenttigi Qostanaı oblysyndaǵy bilim basqarmasyna habarlasyp, oblys boıynsha qansha mektep baryn anyqtady.

Resmı málimetke sáıkes, Qostanaı oblysynda jalpy sany 504 mektep bar. Qazaq mektebiniń sany – 120, orys mektebiniń sany – 263 jáne aralas mekteptiń sany – 121. Al qala boıynsha 6 qazaq mektep, 17 orys mektep jáne 10 aralas mektep bar.

Atalmysh materıalǵa túzetýler engizildi.

Qamshy.kz aqparat agenttiginiń bul maqalany jazýdaǵy maqsaty – shý týdyrý emes. Shyn mánisinde, Qamshy.kz saıty elimizdiń soltústik óńirindegi qazaqtildi mektepterdiń jaǵdaıy jaqsy emes ekeninen oqyrmandy qulaǵdar etkisi keldi. Alaıda atalǵan másele áleýmettik jeli jáne saıt arqyly taralǵan kezde oǵan artyq emosıa qosylyp, túsinispeýshilikter oryn alǵan.

Qamshy.kz aqparat agenttigi Qostanaı qalasynyń ákimdigine osy máselege jedel nazar aýdarǵany úshin óz rızashylyǵyn bildiredi.