Mıtıńtiń maqsaty – qazaqstandyqtardy el ishindegi beıbitshilik pen turaqtylyqty saqtaýǵa jumyldyrý bolatyn. Oǵan qatysqan qoǵam qaıratkerleriniń, zıaly qaýym ókilderiniń, óner tarlandarynyń, kópbalaly analardyń jáne jastardyń oı-pikirleri bir baǵytta toǵysyp jatty.

Minberge shyǵyp sóz alǵan respýblıkalyq «Nur Otan» partıasy Almaty qalalyq fılıaly tóraǵasynyń birinshi orynbasary Stanıslav Konkýrov ta otandastarymyzdy jat elde otyryp bizdiń tynyshtyǵymyzdy buzýǵa áreket etip júrgen aram pıǵyldy adamdardyń arandatýyna ermeýge shaqyrdy.

      –  Súıikti Qazaqstanymda ósip-ónip, bilim alyp, bıznespen aınalysyp, tabystarǵa jettim. Qoǵamdyq istermen aınalystym. Qaı ispen shuǵyldanbaıyn, árqashan partıanyń  qoldaýyn kórdim. Al arandatýshylar degen kimder? Ózderińiz jaqsy bilesizder, olardyń biri – Áblázov. Memleket qarjysyn urlap, shetelge qashqan alaıaq. Shetelde otyryp eldi búldirgisi keledi. Onyń sózine kim senedi? Elge jany ashıtyn adam elmen birge bolmaı ma?! Keshegi Arys oqıǵasynda baýyrlarymyzǵa nege kómektespedi? Bos sózden basqa eshteńe bitirip otyrǵan joq.

Bizdiń Almaty qalalyq «Nur Otan» partıasy Arysqa birinshi kúni-aq 150 tonna qurylys materıaldaryn, 30 tonna gýmanıtarlyq kómek jóneltti. Halyqty búlikke shaqyrýshylar sol kezde qaıda boldy? Halyq aqymaq emes, kimniń kim ekenin jaqsy biledi. Ózderińiz bilesizder, elimizde partıa kóp. Biraq kópshiligi qınalǵanda bizge keledi. Óıtkeni, biz ashyqpyz, halyqqa jaqynbyz. Biz bárimen birgemiz! Sondyqtan da biz almaıtyn qamal bolmaıdy, – dedi S.Kankýrov.

Osy oraıda aıta keteıik, «Nur Otan»partıasyna jylyna 100 myńnan astam adam ótinishpen júginedi. Tek bir Almatynyń ózinde jyl saıyn 10 myńdaı adamdy jeke qabyldap, olardyń muń-muqtajy tyńdalyp, 70 paıyzynyń máselesi oń sheshimin taýyp otyrady.