Iá, beıbit ómirdi, turaqtylyqty bári qalaıdy. Al bizde ol bar. Biraq sol tunyǵymyzǵa tas laqtyryp, ony laılaǵysy keletinder ózderiniń teris pıǵyldaryna bizdiń jastarymyzdy da paıdalanǵysy keledi. Al jastar – qoǵamnyń negizgi qozǵaýshy kúshi. Eldiń búgini de, erteńi de – jastar. Memleket árkez basty nazardy jastarǵa bólip, barynsha jan-jaqty jaǵdaı týǵyzyp keledi. Olardyń  qalaǵan bilimin alýyna, jumys isteýine, shyǵarmashylyqpen shuǵyldanýyna, jalpy ósip-ónýine tolyq múmkindik bar. Búginde Qazaqstan jastary dúnıeniń tórt buryshynda úzdik bilim ordalarynan bilim alýda. Kásipkerlikpen aınalysyp, tabysqa jetýde. Sportpen shuǵyldanyp, jeńis tuǵyrynan kórinýde. Elbasy bıylǵy jyldy arnaıy «Jastar jyly» dep jarıalady. Sonyń aıasynda qanshama ıgilikti ister júzege asyrylyp jatyr.

Mıtıńte qoǵam qaıratkerlerimen, zıaly qaýym ókilderimen birge sóz alǵan Almaty qalalyq máslıhatynyń depýtaty, dańqty sportshy Islam Baıramýkov oı-pikirlerin jastarǵa baǵyttady.

      –  Men sportshy bolǵannan keıin jastar arasynda kóp bolamyn. Jalpy, elimizge, onyń ishinde jastarǵa jasalǵan qamqorlyq pen ıgilikti is-sharalardyń barlyǵyna Táýelsizdiktiń arqasynda, turaqtylyq pen tynyshtyqtyń nátıjesinde qol jetkizip otyrmyz. Sondyqtan da, jastarǵa aıtarym, keıbir iritki salýshylardyń jetegine ermeı, qol jetkizgen osynaý ıgiligimizdi kózdiń qarashyǵyndaı saqtaı bileıik. Qazir keıbir jastar arasynda «Men oıandym» degen sóz sánge aınalypty. Tústen keıin bul ne qylǵan oıaný? Onyń baıybyna barmastan, álde kóshten qalmaıyq dep dúrmekkke ilesý me?    Belsendi bolǵan jaqsy, biraq árbir istiń mánine boılaǵan odan da jaqsy. Aqıqatyna keler bolsaq, sender uıyqtap jatqanda, biz el qurdyq. Sender uıqyda bolǵan kezde, biz eldi jańǵyrtatyn iri-iri reformalardy qolǵa aldyq. Naryqtyq qatynastardy batyl engizip, jańa júıe qurdyq. Toqsanynshy jyldardaǵy qıyndyqtardy eńserdik. Táýelsizdikti nyǵaıtyp, Qazaqstandy álem tanıtyn elge aınaldyrdyq. Jeke óz basyma kelsem, qazaqtyń kók baıraǵyn Olımpıadada jelbirettim. El birligin oılap, qoǵamdyq isterge belsene aralastym. Oıaný degen – «búırekten sıraq shyǵarý» emes. Oıaný degen –el ishine iritki salý emes. Jastyq jigerdi durys iske, damýǵa, el ıgiligine arnaıyq, – dedi I.Baıramýkov.

Beıbit sherýdegi sóz alǵan kórnekti aqyn, Qazaqstan Respýblıkasynyń eńbek sińirgen qaıratkeri Júrsin Erman, Medeý aýdandyq ardagerler keńesiniń tóraǵasy, Qazaqstan Áskerı ǵylymdary akademıasynyń múshesi, belgili qoǵam qaıratkeri Kım Serikbaev, «Nur Otan» partıasynyń Almaty qalalyq fılıaly tóraǵasynyń birinshi orynbasary Stanıslav Kankýrov jáne taǵy basqalar kópshilikti, onyń ishinde jastardy Táýelsizdik degen tátti uǵymnyń qadir-qasıetin baǵalaı bilýge shaqyrdy.