«Qazaqstan Temir Joly» zamanaýı tehnologıamen qurastyrylǵan jańa plaskart vagondardy «Almaty-Mańǵystaý» baǵytynda júretin poıyzdarǵa qosty. Shildeniń 22-juldyzynda Alataý bókterinen bet alǵan júrdek poıyz búgin Mańǵystaýǵa kelip toqtady. 54 jatyn orny bar jańa vagondarda turǵyndardyń jaılylyǵymen qosa qaýipsizdigi úshin de qolaıly jaǵy qarastyrylǵan. Atap aıtqanda, salqyndatqysh, aýa tazartatyn súzgi, tońazytqysh  sondaı-aq órt sóndirý quraldarymen jabdyqtalǵan. Sonymen qatar, keıingi úlgidegi baqylaý kameralary, eki bıo ájethana, uıaly telefon qýattaǵyshtar men taza sýlar da  qol jetimdi. Buryn tozyǵy jetken vagondarmen jol júrý biraz qıyndyq týdyrǵan bolsa, búginde turǵyndar jańalyqty estip qýanýda.

«Almaty-Mańǵystaý baǵytynda júretin poıyzdarǵa ázirge 25 jańa plaskart vagon bólindi.  Búgin kelgen №377-378  poıyzyna 9 plaskart vagon tirkelse, osy baǵyttaǵy taǵy eki quramǵa 8 vagon jalǵanady. Halyqtyń kóńilinen shyǵýda. Buryn poıyz toqtaǵan  stansıalarda ájethanalar jabylyp, jolaýshylarǵa yńǵaısyzdyq týǵyzsa, jańa vagondarda barlyǵy avtomattandyrylǵan. Kún qansha ystyq bolsa da, salqyndatqysh arqyly bir temperatýrany qoıyp jaılylyq ornatýǵa múmkindik bar», - deıdi vagon jolserigi Aıbolat Jaılaýbaıuly.

Áleýmettik mańyzy bar baǵyt bolǵan soń arnaıy «Almaty-Mańǵystaý» poıyzyna tirkelgen vagondar, Reseı tehnologıasymen otandyq «Tulpar Talgo» zaýytynda qurastyrylǵan. Mamandardyń aıtýynsha, jańa vagondardyń bir ereksheligi qys mezgilinde vagon ishinde jylytý jumystary úshin jaǵdaı qolaıly. Jylý taratatyn qurylǵy ishine burynǵydaı sý emes, tosol quıylady, ol joǵary temperatýra kezinde qatyp qalmaıdy eken. Aldaǵy ýaqytta barlyq vagondar osylaı jańartylady degen jospar bar.