Osy másele boıynsha kásipkerlerdi aqparattandyrý maqsatynda ındýstrıalyq sertıfıkatty qoldaný sharttary men mehanızmderi týraly Mańǵystaý oblysy kásipkerler Palatasynda basqosý ótti.

Indýstrıalyq sertıfıkat- otandyq taýar óndirýshilerdiń, jumystar men kórsetiletin qyzmetterdiń tiziliminde ótinish berýshiniń bolýyn rastaıtyn qujat.

Ótinish berýshini tizilimge ený kezinde negizgi qujattardyń biri osy bolyp sanalady. Taýar óndirýshiniń tizilimde bolý merzimi jyl saıynǵy jańartdy eskere otyryp, uzartý quqyǵymen qosa eseptegende úsh jyldy quraıdy.

Atap óteıik, Tóralqanyń 2018 jylǵy 28 jeltoqsandaǵy №28 sheshimimen otandyq taýar, jumys jáne qyzmet óndirýshiler tizilimin qalyptastyrý jáne júrgizý, sondaı-aq ındýstrıalyq sertıfıkattar berý qaǵıdalary bekitildi.

Kásipkerlermen kezdesý barysynda ÓKP dırektorynyń orynbasary Nurlybek Jarylǵapov: "Indýstrıalyq sertıfıkat ıeleri ony aldyn ala biliktilik irikteýinen ótý kezinde qoldana alady jáne jalpy bal somasynyń 20% qosymsha alady. Budan basqa, ındýstrıalyq sertıfıkat memlekettik satyp alýǵa qatysýǵa, otandyq taýarlardy, jumystar men qyzmetterdi shetelde kórsetý boıynsha shyǵyndardy óteýge ruqsat beredi. Otandyq taýar óndirýshiler, jumys jáne qyzmet óndirýshiler tizilimine kirý úshin kásipker ESK kómegimen «doc24.kz» saıtta tirkelýi qajet",– deıdi.

1 shildeden bastap memlekettik satyp alý erejelerine ózgerister engiziledi, oǵan sáıkes "qarapaıym zattar ekonomıkasy" taýarlardy satyp alýǵa bilikti jetkizýshiler tizilimine engizilgen óndirýshiler ǵana qatysa alady. Onyń ústine, birinshi kezekte jańa engizilimder Jıhaz jáne jeńil ónerkásip kásiporyndaryna áser etedi.

Indýstrıalyq sertıfıkatty qoldaný sharttary men tetikteri týraly sertıfıkattaý jónindegi maman Asqat Ysqaqov egjeı-tegjeıli aıtyp berdi: "Sertıfıkatty alý rásimi eki kezeńde júzege asyrylady. Birinshi- salalyq sarapshy óndiristiń jaı-kúıin kózben kórip, taldaý júrgizedi. Jergilikti jerde óndiristiń naqty jaǵdaıyn kásiporynnyń usynylǵan qujattarymen salystyryp tekseredi. Ekinshi kezeń - óńirlik kásipkerler palatasyna ótinish berý. Bul kezeńde biz óndiristi tekserip, qujattamany tekseremiz. Qajet bolǵan jaǵdaıda qujattar pysyqtaýǵa jiberiledi, ne ındýstrıalyq sertıfıkat berý týraly sheshim qabyldanady", - deıdi ol.