«Nur Otan» partıasy Tóraǵasynyń Birinshi orynbasary Baýyrjan Baıbek kópten beri partıa múshesi bolýdy armandap júrgen aqtaýlyq qoǵam belsendisi Baıan Jalmaǵanbetovany arnaıy qabyldap, oǵan partıalyq bıletin saltanatty túrde tapsyrdy.

Baıan Jalmaǵanbetova elimizde múmkindigi shekteýli jandardyń múddesin qorǵap, áleýmettik jeliler men basqa da alańdarda osy máseleni jıi kóterip júrgen belsendilerdiń biri. Ózi de taǵdyrdyń synaǵyna tap bolǵanymen, oǵan esh moıymaı, alǵa umtylyp, ıgi isterimen tanylyp keledi. Aldaǵy ýaqytta osy baǵyttaǵy bastamalaryn «Nur Otan» partıasymen birlesip júzege asyrýdy maqsat tutqan ol partıa múshesi bolýdy kópten beri kózdep júrgen.

Sondyqtan da ótken juma kúni Nur-Sultan qalasyndaǵy «Báıterek» monýmenti mańynda partıa Tóraǵasynyń Birinshi orynbasary Baýyrjan Baıbekpen kezdeısoq kezdesip qalǵan kezde birden osy oıyn jetkizgen. Sol kezde partıa Tóraǵasynyń Birinshi orynbasary aldaǵy ýaqytta arnaıy kezdesip, partıaǵa saltanatty túrde qabyldaıtynyn aıtqan edi.

– Sol kezde bergen ýádemizge baılanysty búgin ýaqyt bólip, ózińizben arnaıy kezdesip otyrmyz. «Nur Otan» partıasy osydan 20 jyl buryn Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaev qurǵan elimizdegi jetekshi saıası kúsh. Sol ýaqyttan beri partıa halqymyzdyń birligi men el irgesiniń beriktigin qamtamasyz etip keledi. Sondyqtan qatarymyzǵa ózińiz sıaqty elimizdiń erteńine beı-jaı qaramaıtyn, naǵyz patrıot azamattardy qabyldaımyz, – degen Baýyrjan Baıbek qazirgi tańda partıa jumysyn qaıta jandandyrý isi qarqyndy júrgizilip jatqanyn jáne aldaǵy ýaqyttaǵy baǵyt-baǵdaryn tilge tıek etti.

Sonymen qatar ol ómirde túrli qıyndyqtar men synaqtardyń bolatynyn, ondaı kezde adam saǵy synbaı, aldyna naqty maqsattar qoıyp, soǵan talpyný qajet ekenin aıtyp, Baıan Jalmaǵanbetovanyń belsendiligi barsha qazaqstandyqtarǵa úlgi ekenin jetkizdi.

– Bizdiń partıa qıyndyqtarǵa qaramastan joldan jańylmaı, arman-maqsatyna jetý jolynda aıanbaı eńbek etip kele jatqan siz sıaqty azamattardy qoldaıdy. Bul – partıa Tóraǵasynyń tikeleı tapsyrmasy. Sondyqtan biz sizdiń qatarymyzǵa qosylyp, partıa múshesi atanýyńyzdy zor qýanyshpen qabyldaımyz. Soǵan baılanysty búgin ózińizdi arnaıy qabyldap, partıalyq bıletińizdi saltanatty jaǵdaıda tapsyrýdy uıǵardyq, – dedi Baýyrjan Baıbek.

Óz kezeginde Baıan Jalmaǵanbetova partıa Tóraǵasynyń Birinshi orynbasaryna jeke qabyldap, zor qoshemet kórsetkeni úshin sheksiz alǵysyn bildirip, «Nur Otan» partıasynyń múshesi atanǵanyna erekshe qýanyshty ekenin jetkizdi.

– Bul meniń kópten beri oılap júrgen armanym bolatyn. Óıtkeni Elbasy partıasynyń áleýmettik baǵyttaǵy bastamalardy tabysty júzege asyryp kele jatqanyn jáne múmkindigi shekteýli jandardy qoldaýǵa arnalǵan «Kedergisiz keleshek» jobasynyń bar ekenin jaqsy bilemin. Sondyqtan ózim osy partıanyń múshesi bolyp, elimizdegi múmkindigi shekteýli azamattardyń jaǵdaıyn jaqsartýǵa partıamen birge óz úlesimdi qossam deımin, – dedi B.Jalmaǵanbetova.

Sondaı-aq ol kezdesýde óziniń usynystaryna toqtalyp, keleshekte múmkindigi shekteýli balalardy ońaltý, oqytý jáne psıhologıalyq qoldaý kórsetý ortalyǵyn ashqysy keletinin aıtty.

Aıta keteıik, Elbasy, partıa Tóraǵasy Nursultan Nazarbaev Qazaqstan halqyna arnaǵan Joldaýlarynyń birinde «Nur Otan» partıasyna elimizdegi múmkindigi shekteýli azamattardyń ómir súrý sapasyn arttyrý jumystaryn qolǵa alýdy tapsyrǵan bolatyn. Sonyń barysynda kedergisiz orta qalyptastyryp, múmkindigi shekteýli azamattardyń kásipkerlikpen aınalysýyna jaǵdaı jasaý máselesine erekshe basymdyq berdi. Osyǵan oraı partıa 2014 jyldan beri «Kedergisiz keleshek» jobasyn júzege asyryp keledi. Joba aıasynda atalǵan azamattardy jumyspen qamtý, olardyń qoǵamdyq jáne áleýmettik ómirge belsendi aralasýyna jaǵdaı jasaý, ınklúzıvti bilim alý isin damytý, quqyqtarynyń qorǵalýyn qamtamasyz etý jáne taǵy da basqa ózekti máseleler oń sheshimin taýyp keledi.

Sonymen qatar qabyldaý barysynda osy salada belsendi eńbek etip júrgen azamat Jánibek Orynbasarovqa da partıalyq bılet saltanatty túrde tapsyryldy.