Aqtaýda «Nur Otan» partıasy Mańǵystaý oblystyq fılıalynyń saıası keńes otyrysy ótti. «Nur Otan» partıasy Mańǵystaý oblystyq fılıalynyń tóraǵasy, óńir basshysy Serikbaı Trumov tóraǵalyq etken jıynǵa Saıası keńestiń músheleri, partıa ardagerleri, barlyq deńgeıdegi máslıhattardaǵy depýtattar qatysty. Kún tártibinde qaralǵan alǵashqy másele – Elbasy, partıa Tóraǵasy Nursultan Nazarbaevtyń «Nur Otan» partıasy Saıası keńesiniń keńeıtilgen otyrysynda bergen tapsyrmalaryn júzege asyrý joldary talqylandy.
– «Senim. Dıalog. Bolashaqqa nyq qadam – «Nur Otan» partıasynyń 7 serpini» atty baǵdarlamasynyń basty tetikteri – ashyqtyq, belsendilik, partıalyq baqylaýdy kúsheıtý, bastaýysh uıymdardyń jumystaryn jandandyrý, memlekettik baǵdarlamalardy túsindire bilý, halyqtyń mádenıeti men bilimin kóterý, jas mamandarǵa múmkindik jasaý qajettigin taǵy bir atap ótti. Partıa óz qyzmetinde jarıalylyq pen tıimdilik, esep pen baqylaý, talap pen jaýapkershilik syndy qaǵıdalarǵa arqa súıeýi kerek jáne partıanyń oblystyq fılıaly da óz jumysyn Elbasynyń tapsyrmalaryna sáıkes jandandyrýy tıis, dedi oblys ákimi Serikbaı Trumov. Sonymen qatar, aımaq basshysy máslıhat depýtattary men qoǵam belsendilerin óńirdiń damýy úshin birlesip jumys isteýge shaqyrdy.
- Partıanyń qazirgi tańdaǵy negizgi mindetteriniń biri – halyqpen ashyq qarym-qatynas ornatý jáne keri baılanysty qamtamasyz etý dep bilemiz. Qoǵamdyq qabyldaýlarda keri baılanys jolǵa qoıylyp, turǵyndardyń árbir aryzy sheshilmeıinshe, baqylaýdan alynbaıtyn boldy. Jergilikti jerdegi depýtattyq fraksıalardyń jumysyn jandandyrý búgingi kúnniń basty máselesi bolyp tabylady.Sonymen birge, Aqtaý qalasyndaǵy 100 oryndyq onkologıa dıspanseriniń qurylysy uzaq jyldardan beri toqtap qalǵan bolatyn. Bul joba «Qutty meken» jobasy aıasynda partıalyq baqylaýǵa alynyp, jaýapty mekemeler nysandy 2020 jyldyń sáýir aıynda iske qosýdy kózdeýde, - dedi «Nur Otan» partıasy Mańǵystaý oblystyq fılıaly tóraǵasynyń birinshi orynbasary Elýbaı Ábilov. 
Sonymen qatar, alqaly jıynda Elbasy atap ótkendeı, «Qazirgi tańda «jańa» medıa salada shyndyqqa janaspaıtyn aqparat taratýshy arnalar kóbeıip keledi. Jergilikti, qarapaıym máseleler respýblıkalyq deńgeıge deıin kóterilýde. Qoǵamdyq sanada jalǵan túsinik qalyptasýda. «Nur Otan» partıasy óziniń aqparattyq strategıasyn túbegeıli qaıta qaraýy qajet. Partıanyń buqaralyq aqparat quraldary obektıvti jáne jedel aqparat kózderine aınalyp, halyqtyń senimine ıe bolýy tıis», ekendigi aıtyldy.
Kún tártibinde qaralǵan ekinshi másele - «Nur Otan» partıasynyń «Qazaqstan – 2021: Birlik.Turaqtylyq.Jasampazdyq» atty saılaýaldy baǵdarlamasynyń júzege asyrylý barysy týraly» oblystyq ekonomıka jáne búdjetti josparlaý basqarma basshysynyń mindetin atqarýshy Svetlana Nareshova baıandama jasady.
- Aǵymdaǵy jyldyń 7 aıynyń qorytyndysy boıynsha óńirde 1,7 trln. teńgeniń ónerkásiptik ónimi óndirilip, salanyń naqty kólem ındeksi 98,6% qurady. Jalpy ónerkásiptik óndiristegi úlesi 90% bolatyn taý-ken óndirisiniń kólemi 1,5 trln. teńgeni nemese naqty kólem ındeksi 98,4%-ti, onyń ishinde munaı óndirý kólemi 99,3%-dy qurap otyr. Óńir ekonomıkasyna 243 mlrd.teńge ınvestısıa tartylyp, 78%-dy qurady. Al, bilim salasy boıynsha jyl basynan beri 1628 oryndyq 22 balabaqsha paıdalanýǵa berilgen. Bul balabaqshalardyń barlyǵy jeke ınvestısıa esebinen salyndy. Qazirgi tańda oblysta 3 pen 6 jas aralyǵyndaǵy balalardy balabaqshamen qamtý kórsetkishi 97%, jyl qorytyndysymen bul kórsetkishti 100%-ǵa jetkizý kózdelip otyr. Orta bilim berý salasynda úsh aýysymdy oqytýdy boldyrmaý baǵytynda júıeli jumystar júrgizilip keledi. Aǵymdaǵy jyly 3100 oryn bolatyn 5 mekteptiń qurylysy júrýde. Onyń ishinde Atameken jáne Basqudyq aýyldaryndaǵy qoldanystaǵy mektepke árqaısysy 320 oryndyq qosymsha ǵımarat jyl sońyna deıin paıdalanýǵa beriledi. Qalǵan 3 jańa mektep qurylysy kelesi oqý jylynda tapsyrylady. Tabıǵı ósim eskerile otyryp 14 124 oryndyq 21 mekteptiń jobalyq-smetalyq qujattamalary jasaqtalýda.Oblystaǵy barlyq bilim berý uıymdary beınebaqylaý júıesimen qamtyldy.Transport ınfraqurylymyn damytý boıynsha Quryq portynda parom kesheni iske qosyldy. Nysan iske qosylǵannen beri jyly jalpy kólemi 3 mln. tonna júk tasymaldandy.- dep atap ótti Svetlana Bolatqyzy.
Saıası keńes kezinde oblystyq máslıhat depýtaty Abat Órisbaev pen qoǵam belsendisi Aıat Súgirbaı sóz alyp, óz usynystaryn ortaǵa saldy.