Kóshi-qon úderisin baqylaý jáne zańsyz eńbek mıgranttarynyń tasada qalýyna tyıym salý maqsatynda bir tereze ádisimen qurylǵan «Azamattarǵa arnalǵan úkimet» memlekettik korporasıasynyń Almaty Kóshi-qon qyzmeti ortalyǵyna bir jyl tolyp otyr. Ortalyq jumysyna ásirese, sheteldik jumysshylar dán rıza.

 –Bizde de mundaı ortalyq bar, alaıda qujattarymyzdy dál osylaı jyldam rásimdeı almaımyz. Munda bir jerde, 1-2 saǵatta qujatyńyz daıyn, - deıdi Bakýden kelgen Rýstam Armanov ortalyq qyzmetine rızashylyǵyn bildirip.

 –Ortalyqta eńbek ruqsattaryn berýge tartylǵan barlyq qurylymdar (bank, notarıýs, medısınalyq qyzmetkerler, saqtandyrý agentteri) ornalasqan. Bul qyzmettiń merzimin 7 kúnnen 2 saǵatqa deıin qysqartýǵa jáne eńbek mıgranttaryna ekonomıkanyń "kóleńkeli sektorynan" shyǵýǵa jáne sybaılas jemqorlyq kórinisterin azaıtýǵa múmkindik berdi, - deıdi  «Azamattarǵa arnalǵan úkimet» memlekettik korporasıasy Almaty qalasy fılıaly dırektory Danıar Qyryqbaev.

      Jyl saıyn Qazaqstanǵa shamamen 6 mln shetel azamaty keledi eken. Sonyń kópshiligi respýblıkanyń eń úlken megapolısiniń biri - Almaty qalasynyń úlesine tıetin kórinedi.

 –Bizdiń ortalyqtaǵy 26 maman kúnine 400-500 adamǵa qyzmet kórsetedi. Jaz mezgilinde kelýshiler sany 800-ge deıin bolady. Keletinder negizinen Reseı, Ózbekstan, Qyrǵyzstan sıaqty TMD azamattary,- deıdi Almaty qalasy Kóshi-qon ortalyǵynyń basshysy Ǵalym İskendiruly.

         Almatydaǵy mıgrasıalyq ortalyqtyń jumysyna sheteldikter rıza bolyp, jumystarynyń jyldam bitkenine alǵystaryn jaýdyryp jatady. Ásirese, mıgrasıalyq ortalyq ashylmaı turǵanda qyzmet  alyp kórgender, búgingimen salystyra otyryp qyzmet alýda Qazaqstannyń tájirıbesin joǵary baǵalaıdy. Tipti, jaqynda Orta Azıa elderiniń İshki ister mınıstrleri de kelip ortalyq jumysymen tanysyp ketti. Qyrǵyzstan İshki ister mınıstri Kashkar Djýnýshalıev, Tájikstan İshki ister mınıstri Rahımzoda Ramazon jáne Ózbekstan İshki ister mınıstri Pýlat Babadjanov ortalyq jumysynyń qolaılylyǵy men tıimdiligin kórip, bul tájirıbeni óz elderinde júzege asyratyndaryn aıtty.

    «Azamattarǵa arnalǵan úkimet» memlekettik korprasıasynyń Almaty Kóshi-qon ortalyǵy bir jyl ishinde eńbekshi kóship kelýshilerge  54 946 ruqsat bergen jáne merzimin uzartqan. Qazaqstan Respýblıkasynda ýaqytsha bolatyn sheteldikter men azamattyǵy joq adamdardy tirkeý boıynsha 71900 qyzmet kórsetken.