Nur-Sultan qalasyndaǵy Abaı kóshesiniń boıynan Qalamgerler aleıasy ashyldy dep habarlaıdy Qamshy.kz aqparat agenttigi. Bul týraly qalalyq ákimdiktiń resmı saıtynda habarlandy. 

Elordada ótip jatqan Azıa elderi qalamgerleriniń İ forýmyna qatysýshy aqyn-jazýshylar Qalamgerler aleıasynyń ashylýynyń kýási boldy. Saltanatty sharaǵa qala ákiminiń orynbasary Bahtıar Máken men Qazaqstan Jazýshylar Odaǵynyń tóraǵasy Ulyqbek Esdáýlet jáne Oljas Súleımenov, Tynyshtyqbek Ábdikákimuly syndy qabyrǵaly qalamgerler qatysty.

Sharada alǵashqy bolyp sóz alǵan shahar basshysynyń orynbasary Bahtıar Máken qalany jaqsartýda budan basqa da jospardyń kóp ekenin atap ótti. Al óz kezeginde jınalǵandardy quttyqtaǵan Qazaqstan Jazýshylar odaǵynyń tóraǵasy Ulyqbek Esdáýlet Qalamgerler aleıasynyń hakim Abaıdyń atymen atalatyn kósheniń boıynan oryn tebýi tegin emes ekenin jetkizdi. "Uly Abaıdyń kóshesiniń boıynda ornalasqan Qalamgerler aleıasymen kele jatqan aqynnyń shabyty kelip, oıynan óleńniń tógilmeýi múmkin emes. Aleıa Nur-Sultanǵa nur qosyp, turǵyndardyń júregine jyr qosa bersin", - dedi Ulyqbek Esdáýlet.

Abaı - Á. Sembınov kósheleriniń qıylysynda ornalasqan Qalamgerler aleıasy Egemen Qazaqstan kóshesine deıin sozylyp jatyr. Aleıa aýmaǵy - 1,2 gektar. Onyń 5,7 myń sharshy metrine tas tóselse, 4,2 myń sharshy metri abattandyrylǵan. Iaǵnı 50 shyrsha egilip, 428 jaryqsham ornatylǵan. Al aleıanyń qaq ortasyna Abaıdyń sózi jazylǵan mramordan jasalǵan kitap qoıylǵan.