Aqtaýdaǵy Nazarbaev Zıatkerlik mektebinde «Mektepterge kún energıasy» jobasynyń ekinshi kezeńi júzege asty. Bilim ordasynda kún stansıalary iske qosyldy.

Saltanatty sharaǵa Mańǵystaý oblysynyń ákiminiń orynbasary Qanybek Jumashev, «Nazarbaev Zıatkerlik mektepteri» DBBU basqarma tóraıymy Kúlash Shamshıdınova jáne «Shell Qazaqstan» kompanıasynyń ókilderi qatysty.

Endi oqý ornynyń terıtorıasyna ornatylǵan 320 panel tutynylatyn elektr energıasyn 30%-ǵa deıin únemdeıdi. Qurylǵy 100 kvt/saǵ energıa óndiredi.

Kún stansıalarynyń iske qosý qurmeti «Shell Qazaqstan» kompanıasynyń komersıalyq máseleler jónindegi bas menedjeri Eıden Merfı men bilim ordasyndaǵy 12-synyp oqýshysy, kóptegen respýblıkalyq, halyqaralyq baıqaýlar jeńimpazy Ǵalammadın Asqarǵa buıyrdy.

-Zıatkerlik mektepterde ekinshi jyl júzege asyrylatyn «Mektepterge kún energıasy» jobasy biz úshin basymdyq bolyp tabylady. Bul STEM-bilim berýdi engizý úshin jáne eń bastysy, oqýshylarymyzdyń ekologıalyq mádenıetin, tabıǵatqa jaýapkershilikpen qaraýdy tárbıeleý úshin tabysty joba. Búginde ornatylǵan kún júıeleri mektepterdiń energıa tutynýyn shamamen tórtten bir bólikke tómendetýge múmkindik beredi jáne bul jasyl ekonomıkanyń jahandyq mánin dáleldeıtin kórsetkish, - dedi «Nazarbaev Zıatkerlik mektepteri» DBBU basqarmasynyń tóraıymy Kúlásh Shámshıdınova saltanatty shara barysynda.

 «Mektepterge kún energıasy» - «Shell» álemdik munaı-gaz brendiniń pılottyq jobasy 2018 jyldyń 1 jeltoqsanynda «Nazarbaev Zıatkerlik mektepteri» DBBU 10 jyldyq mereıtoıyna arnalǵan «Uly dala murageleri» forýmynda QR Tuńǵysh Prezıdenti N.Á.Nazarbaevqa tanystyrylǵan bolatyn. Joba Energetıka mınıstrligi, «Shell» kompanıasy jáne «Nazarbaev Zıatkerlik mektepteri» DBBU birlesken memorandýmy aıasynda júzege asyp otyr.

«Shell» kompanıasynan eń alǵashqy kún energıasyn 2018 jyly Nur-Sultan qalasyndaǵy fızıka-matematıkalyq baǵyttaǵy Nazarbaev Zıatkerlik mektebi alǵan bolatyn. Munda 100 Kvt/saǵ qýaty bar fotoelektrli panelderi ornatylǵan kólik turaǵy salyndy. Bıylǵy jyly Oral, Atyraý, Almaty qalalaryndaǵy bilim oshaqtarynda osyndaı kún stansıalary ornatylady.