Mańǵystaý óńirinde ótip jatqan Kongres - hırýrgıanyń, gınekologıanyń, onkologıanyń, balalar hırýrgıasynyń, ásirese ártúrli aýrýlardyń hırýrgıalyq emdeýdiń ózekti máselelerin talqylaý úshin tamasha múmkindik. Sonymen qatar, Kongres Kaspıı mańy elderiniń hırýrgıalyq qaýymdastyǵy ókilderiniń yntymaqtastyǵyn nyǵaıtýda mańyzy zor.

Aldymen sóz alǵan Mańǵystaý oblysy densaýlyq saqtaý basqarmasynyń basshysy Ánýar Saǵymbaev, aımaqta jasalatyn otalardyń 70% astamy qazirgi zamanǵy endohırýrgıalyq tehnologıalardy paıdalanýmen ótkiziletinin tilge tıek etti. Sondaı-aq, mańǵystaýlyq hırýrgter elde alǵashqylardyń biri bolyp jetekshi sheteldik klınıkalarda endoskopıalyq hırýrgıa boıynsha taǵylymdamadan ótken. Vedomstva basshysy keler 2020 jyldan bastap elimizde júzege asyrylatyn mindetti áleýmettik medısınalyq saqtandyrý týraly da aıtyp ótti.

Sharada sóz alǵandar qatarynda Kongrestiń qurmetti tóraǵasy Serik Toqpanov, elimizdiń bas onkology Dılára Qaıdarova, medısına ǵylymdarynyń doktory,  profesor Jaqsylyq Dosqalıev bar. Kongrestiń alǵashqy kúninde kolorektaldy hırýrgıanyń bolashaǵy, onkologıadaǵy laparoskopıa, balalardaǵy qolqa jáne onyń tamyrlaryndaǵy endohırýrgıaly otalar, qazirgi zamandaǵy endoskopıalyq hırýrgıa, qateler men asqynýlardy aldyn-alý, elimizdegi transplanttaýdy úılestirý qyzmeti, uıqybeziniń jylaýyq neoplazıasyn optımaldy emdeý, egizderge transfýzıa sındromyn fetoskopıalyq emdeý máseleleri talqylandy.

Tórt klınıkalyq bazada, atap aıtqanda Mańǵystaý oblystyq aýrýhanasy, perınataldyq ortalyq, balar aýrýhanasy jáne onkologıalyq dıspanserde otandyq jáne sheteldik jetekshi endoskopıalyq hırýrgter qazirgi zamanǵy endohırýrgıalyq jabdyqta qursaq qýysy, kishi jambas jáne ishperde artyndaǵy keńistik aǵzalarynda 3D, HD, ICG, 4K formattarynda vızýaldaýmen joǵary tehnologıalyq operasıalar jasaý josparlanǵan.

Mańǵystaý oblystyq perınataldyq ortalyǵynyń dırektory Jamal Jamanbaevanyń aıtýynsha, ǵylymı – praktıkalyq sesıa barysynda jatyr moıyny obyry hırýrgıasyndaǵy laparoskopıanyń múmkindikteri men shekteýleri, onkogınekologıadaǵy ınovasıalarǵa kóbirek kóńil bólinbek.

«Gınekologıa salasyndaǵy laparoskopıalyq operasıalar jasaýda ár dárigerdiń óz tájirıbesi bolady. Al operasıalardy translásıalaý kezinde analyq bezi obyrynyń taralǵan túri kezindegi laparoskopıalyq tolyq birinshi sıtoredýksıanyń dúnıejúzindegi alǵashqy tájirıbesi, laparoskopıalyq jambasty lımfodısseksıasjáne engizý kezeńderine mán beriledi. Sonymen qatar elektrohırýrgıanyń fızıkalyq negizderi, reprodýktıvtik jastaǵy áıelderge jatyr moıyny patologıasyn emdeýdiń qazirgi zamanǵy ádisteri, bastaýysh endoskopısttiń daǵdylaryn damytýdaǵy Wetlab róline de erekshe mán berilmek», - deıdi ol. 

Kongres qorytyndysy boıynsha ǵylymı materıaldar jınaǵy shyǵarylmaq. Shara aıaqtalǵan soń, barlyq qatysýshylarǵa alǵys hattar men sertıfıkattar tabystalatyn bolady.

Aıta ketý kerek, atalmysh sharany ótkizý týraly sheshim Mańǵystaý oblysynyń ákimdigi, Qazaqstan endoskopıalyq hırýrgteri qaýymdastyǵy, Astana medısınalyq ýnıversıteti, Qazaqstan gınekologtar-endoskopısteri qoǵamdyq birlestigi jáne Mańǵystaý oblystyq aýrýhanasy tarapynan qoldaý tapty.