Táýelsizdik alǵaly beri Qazaqstanda kedeıliktiń deńgeıi 10 ese tómendedi. Bul týraly Elbasy Nursultan Nazarbaev keshe Eýrazıalyq ekonomıkalyq odaqqa múshe elderdiń Elordada ótken parlament spıkerleriniń IV keńesinde málim etti.

Tuńǵysh Prezıdent Qazaqstanda ınflásıa 3 myń paıyzǵa jetken tusta eldiń táýelsizdik  alǵanyn, al dúkenderde alatyn túk qalmaı, sóreler bos bolǵanyn tilge tıek etti.

–Barlyq óndiris oryndary toqtady, elde jumyssyzdyq jaılady, tipti zeınetaqy men jalaqyny tóleý múmkin bolmady. Biraq biz naryqtyq ekonomıkany quryp, bul joldan aman-esen óttik. Búgingi tańda eldiń jalpy ishki ónimi 18 ese ósti. Ekonomıkanyń kólemi Orta Azıa elderiniń jalpy ishki ónimi deńgeıinen eki ese joǵary. Dollarmen shaqqanda, halyqtyń tabysy 9 ese artty, al kedeıliktiń deńgeıi 10 ese tómendedi, –dedi Elbasy Nursultan Nazarbaev.  

Elbasynyń aıtýynsha, sońǵy 20 jylda syrttan tartylǵan tikeleı shetel ınvestısıasy 320  mıllıard dollarǵa jetti. Bul sala boıynsha elimiz aımaqta birinshi oryndy bermeı tur.