Jylqy urlyǵyna Qorǵanys mınıstrligi qyzmetkeriniń qatysy bolýy múmkin dep jazady Qamshy.kz aqparat agenttigi KTK telearnasyna silteme jasap.

Aqmolalyq polıseıler Nursultan qalasy mańynan óleksesi tabylǵan 46 bas jylqyny urlaǵandardy qolǵa túsirdi.

Janat Jylqybaev, Aqmola oblystyq PD krımınaldyq polısıa basqarmasy bastyǵynyń mindetin atqarýshy: - Kúdiktiler urlanǵan jylqyny Arshalydan Elordanyń Kóktal shaǵyn aýdanyna aparýǵa MAN júk kóligine artqan. Janjaǵy biteý kólikte munshama mal shydamasa kerek, tunshyǵyp ólgen. Sasqanynan ólekselerdi laqtyryp ketken. 

Kúdiktiniń biri 26 jastaǵy Selınograd aýdanynyń turǵyny da, ekinshisi 41 jastaǵy mınıstrlik qyzmetkeri eken. Ol Qorǵanys mınıstrliginde dardaı bólim bastyǵy bolǵan. Jylqy urlady degen kúdikke ilikken qyzmetker osydan bir apta buryn ǵana mınıstrlikten qýylypty.

Elorda mańynan 28 bas jylqynyń óleksesi tabylǵan edi. Malynan aırylǵan ereımentaýlyq kásipkerdiń aryzy boıynsha polısıa tekserisi kezinde taǵy 18 ólekse Qoıandy aýylynyń mańynan tabyldy.

Qazir eki kúdiktini Ereımentaý aýdandyq soty eki aıǵa abaqtyǵa japty. Olardyń 150 shaqyrym jerdi esh kedergisiz ótýine mınıstrlik qyzmetkeri bedelin salsa kerek. Ol jıp kóligimen alda júrip otyrǵan.