Sońǵy jyldary elimizdiń óneri men mádenıetinde tyń ózgerister men izdenister,zaman aǵynymyna qaraı jańa betburystar baıqalady.Ulttyq mýzykamyzdy zaman yrǵaǵyna qaraı beıimdep, tyńdarmanǵa usyný úrdisi de júrip jatyr. Endigi rette elimizdegi mýzyka salasynda júrgen talanttardy bir ortaǵa toǵystyratyn kólemdi mýzyka baıqaýy kerek-tin. Sol suranysqa saı, shyn talanttardy tańdap, syılyq usynyp marapattaý maqsatynda bıyl tuńǵysh ret ótkeli otyrǵan «Astana juldyzy» Ulttyq mýzyka báıgesi ótkeli otyr.
Álemde mýzyka salasyndaǵy úzdikterdi marapattaıtyn "Gremmı", «World Music Awards»,BRIT EÝORDS sekildi belgili kásibı baıqaýlar men syılyqtar bar. Sondaı baıqaýlardyń otandyq túri - «Astana juldyzy» atty ulttyq mýzyka báıgesi endi bizdiń elimizde de dástúrli túrde ótkiziletin bolady. Mamandardyń pikirinshe, «Astana juldyzy» baıqaýy otandyq mýzyka óndirisindegi tyń qubylys bolmaq. Onyń sońǵy jyldary taǵaıyndalǵan ózge mýzykalyq syılyqtardan basty ereksheligi – birinshi kásibı mýzykalyq báıge bolýynda. Jobanyń basty maqsaty – kásibı bilikti sarapshylardyń tańdaýy arqyly ulttyq mýzykanyń órkendep, órleýine yqpal etý, sapaly mýzykanyń suranysqa keńinen ıe bolýyna jaǵdaı jasaý.
Baıqaý barysynda otandyq mýzyka óneriniń damýyna, jańaryp, jańǵyrýyna áser etken úzdik ónerpazdar, shyn daryndylar ǵana iriktelip alynady. Ádilqazylar alqasy da úzdikterden quralǵan. Quramynda elimizge belgili júzden astam kásibı maman, atap aıtqanda, QR eńbek sińgen ártister, prodúserler, kompozıtorlar, aqyndar, mýzyka jáne fashion-óndiris mamandary, BAQ ókilderi bar Qazaqstannyń Mýzykalyq Akademıasy tańdaıdy.
Bul baıqaýǵa sońǵy bir jyl kóleminde tabandy eńbek etken ónerpazdar, ánshiler, shyǵarmashylyq birlestikter qatysatyn bolady. Sarapshylardyń daýys berýi úshin arnaıy daýys berý paraqshasy daıyndalǵan. Qazaqstannyń Mýzykalyq Akademıasy músheleriniń daýys berýi eki kezeńnen turady. Birinshi kezeńde 15 atalym boıynsha qatysatyn 350 úmitker arasynan laıyqty dep tanylǵan 45 qatysýshy irikteledi. Ekinshi kezeńde úzdik 15 jeńimpaz anyqtalady.
«Astana juldyzy» Ulttyq mýzyka báıgesinde úmitker ónerpazdar 15 atalym boıynsha óz ónerlerin ortaǵa salady. Máselen, "Jyl áni", "Úzdik etno top", "Úzdik dýet", "Qyzdar arasynda úzdik estrada oryndaýshysy", "Jigitter arasynda úzdik estrada oryndaýshysy" sekildi bólimder boıynsha ótedi. Atalym sanynyń 15 bolýy Astana qalasynyń 15 jyldyǵy qurmetine oraılastyrylyp otyr.
Otandyq mýzyka óndirisinińmaıtalmandaryn bir ortaǵa jınaıtyn «Astana juldyzy» baıqaýy 2013 jyldyń 5 shildesinde «Qazaqstan» Ortalyq konsert zalynda ótedi. Marapattaý rásiminde Qazaqstannyń mýzyka tarıhynda qaıtalanbas iz qaldyrǵan oryndaýshylar, sonymen qatar arnaıy shaqyrtylǵan sheteldik qonaq, álemdik sahnalardy baǵyndyryp júrgen Djamala óner kórsetedi.
Endeshe, talaptylardan talanttylardy tańdap alatyn baıqaýdyń ǵumyry uzaq, "syny shyn", ónerlilerdiń órge basýyna septigi tıedi dep senemiz!
P.S.: Byltyr shyǵarmashyl jastardy shabyttandyratyn Halyqaralyq "Shabyt" baýqaýynan shı shyǵyp, kópshilikti bir shýlatqanyn bylaıǵy jurt áli umyta qoıǵa joq. Elimizdiń eń mártebeli syılyǵy sanalatyn Memlekettik syılyqtyń tóńiregindegi daý da dýyldap baryp basyldy. Báıgelerdiń sońyn mundaı bitpes daý-damaıǵa aparatyn nárse - ádilqazylardyń jershildik pen rýshyldyqqa qaraı bura tartatyny, qatysýshylardyń ónerinen góri ataq-abyroıyna buryp turatyn jaǵympazdyq, "kóke" men "qaltanyń" áserinen bolǵany jasyryn emes. Al bıyl tuńǵysh ret tusaýy kesilgeli otyrǵan jańa baıqaý "Astana juldyzy" aldyńdaǵy "aǵa" baıqaýlardan úlgi almaı, shyn talanttardy tańdaı bilse eken... Árıne, talant tarazymen ólshenbese kerek. Alaıda, ónerdiń ósýi úshin yntalandyrý, arnaıy ataq-abyroı da artyqtyq etpeıtinin umytpasaq ıgi...
