Aqtaý qalasynda avtokólikterdi saltanatty tabystaý rásimi ótti. Bul avtobýstar Jańaózen qalasyna qarasty eldimeken mektepteriniń oqýshylaryna qolaısyz aýa-raıyna qaramastan bilim berý ordalaryna qatynaýdy jeńildetpek.

Al, medısınalyq mekemelerine syıǵa tartylǵan úsh reanımobılde shuǵyl kómek kórsetýge qajetti barlyq jabdyqtar, atap aıtqanda reanımasıalyq jáne akýsherlik jınaqtar, ókpeni jasandy jeldetý apparattary, defıbrıllátorlar jáne basqa da aspaptar bar.

Saltanatty sharaǵa «Samuryq-Qazyna» AQ Basqarma tóraǵasy Ahmetjan Esimov pen Mańǵystaý oblysynyń ákimi Serikbaı Trumov qatysty.

-«Mańǵystaý oblysy - elimizdiń eń iri ónerkásiptik aımaqtarynyń biri. Sońǵy 5 jylda óńirde 46 joba júzege asyryldy. Al búgin, dástúr boıynsha, biz Jańaózenniń bilim berý men medısınalyq mekemelerine reanımobılder jáne mektep avtobýstaryn syıǵa tartamyz», - dep atap ótti Ahmetjan Esimov.

Óńir basshysy Serikbaı Trumov: "Kaspıı klýby Samuryq-Qazyna» AQ Mańǵystaý óńiri turǵyndarynyń áleýmettik deńgeıin arttyrý, halyqtyń ómir súrý sapasyn jaqsartý maqsatynda birqatar qaıyrymdylyq jobalardy júzege asyrýda. Búgin syıǵa tartylǵan, mektep oqýshylarynyń qaýipsizdigin qamtamasyz etetin avtobýstar men medısınalyq mekemelerge arnalǵan reanımobılder Qor júzege asyratyn jobalardyń kishi bóligi bolyp tabylady. Osyndaı ıgi iske qoldaý kórsetken «Samuryq-Qazyna» AQ basshylyǵyna jáne «Samruk-Kazyna Trust» qoryna oblys turǵyndarynyń atynan alǵys bildiremin" dedi.

«Samuryq-Qazyna» AQ Biryńǵaı qaıyrymdylyq operatory – «Samruk-Kazyna Trust» Áleýmettik jobalardy damytý qory Mańǵystaý oblysynda 29 ámbebap sport jáne oıyn alańdaryn saldy. Onyń ekeýi bıylǵy jyly ornatylsa, «Alǵa» múgedekter sport klýby jańa trenajerlarmen, Jańaózendegi 10 mektep kompúter jıyntyǵymen jabdyqtalyp, birqatar áleýmettik mańyzdy jobalar iske asyryldy.

Jaqyn arada óńirde eki ońaltý balabaqshasyn jáne bir týberkýlezge qarsy balalar dıspanserin arnaıy tehnıkamen jabdyqtaý josparlanýda.