Kóktem kep, kók maısasyn tósegen be,
Gúlder óleń oqyp tur kóshelerde!
Jıyrma tórt jyl júregim jaıqalǵaly,
Qansha kóktem qaldy eken peshenemde?!

Kóktem kep, kógertken be aınalany,
Qyz-ǵumyr, qyr basynda oılanady.
Kóbelek-kóńil qurǵyr alyp-ushyp,
Kóktemniń burymyna baılanady.

Gúl-álem, shymyldyǵyn ashqany ma,
Kórkemdik,qonap aldy aspanyma.
Túnniń ǵana ıisi shyǵýshy edi-aý,
Kúnniń ıisi sińipti shashtaryma!

Shynymen, qanat bitip ushqanym ba?
Ǵashyq bop qalsam qaıtem, qas-qaǵymda?
Ár sáýlesin keýdeme quıyp turmyn,
Aıyrbastap ala almaı basqa muńǵa.

Kóktem kep kók maısasyn tósegen be,
Gúlder óleń oqyp tur kóshelerde!

***

Bir juldyzdyń sáýlesine jalǵanyp,
Jerge túsken bir ómirdi jalǵa alyp.
Saǵan ǵashyq bolǵan ekem, qaıteıin,
Buıyrmaǵan taǵdyryńa aldanyp.

...Bir ótkinshi nóser bolyp seldetip,
Dala dertin móldir sýmen emdetip.
Ketip qalsam, sónip qalsam dep edim,
Eshkim bilmes jalǵyzdyqty ándetip...

Oshaǵymda meni kútken jar qalyp,
Ol adamǵa jalǵyz óleń arnalyp.
Oqyp tursam seni súıgen qyzdarǵa,
Saǵan jazǵan júz óleńdi qolǵa alyp!

...Sosyn, sosyn kinálasyn Jaryq Kún,
Tún ishinen tań izdegen ǵarippin.
Aq qaǵazǵa armandarym tógilip,
Kúndeı ystyq kúnáhar bop qalyppyn... 

****

Qara jer de júr me meni keshirmeı, 
Nege kettim óz-ózimdi túsinbeı. 
Bir aýyz sóz qalatyndaı aıtylmaı, 
Bir urttam sý qalatyndaı ishilmeı.

Seni súıý mendik syrdyń quny ma? 
Seni súıý tar ǵumyrdyń shyny ma? 
Men ómirge bara jatsam jutylyp, 
Sen júrektiń shyǵyp aldyń shyńyna!

Bir sen úshin jaratqandaı kórkimdi, 
Elesiń kep, urlap aldy erkimdi. 
Bir-aq jutym aýa jetpeı turady, 
Óziń kelip emdeıtindeı dertimdi...

Bir-aq qadam alǵa baspaı turamyn, 
Jaryq ǵalam, sóndirerdeı shyraǵyn! 
Kinám menen kúnám ketti kúrmelip, 
Sen shyǵarsyń bul ómirde synaǵym... 

***

Jalǵyz ǵana bar edi ǵoı, shyndyǵym,
túbine tirlik jetti me ?
Qaı qıyrda júr ekensiń muńlyǵym,
mensiz ómir tátti me?

Jalǵyz ǵana bar edi ǵoı armanym,
Tek perishte kúıinde.
Bul ómirdiń bilip turyp jalǵanyn,
Bola ma eken súıýge...

Keler kúnder jaýaby joq jumbaqtaı,
Qalsaq qaıtem túıisip?
Sen de tursań, men de tursam til qatpaı,
Kóleńkemiz súıisip...

Keler bolsań bul shahardan ket alyp,
(Sen jaqtyń da tańy osylaı ata ma?)
Sensiz ómir súre almaımyn dep alyp, 
...Áli tiri júr ekenmin o, toba?!!! 

***

Qara joldar, seni súısin mańdaıym,
júrektegi sábıimdi aldaıyn... 
Maǵan qaraı ákelmeseń jetelep, 
Bilip bershi sol adamnyń hal-jaıyn...

Qaı qıyrǵa tıdi eken tabany, 
Meken etip, júr me osy qalany...
Joldar...joldar...
jyrlarymdy qushaqtap, 
Kóz-jasymnan úmit jasap alady...

Ákelerdeı sol bir jannyń deregin,
Jol boıyna jaýtań qaǵa beremin...
Kóshelerde kóshe almaǵan kúlkim júr,
Sensiz osy bar ma meniń keregim...

Bir habaryń jetetindeı eleńdep, 
ǵumyrymdy uzartamyn "keler" dep.
Saǵynyshym hatqa aınalyp jaýapsyz, 
Senen buryn alar ma eken Jer emdep... 

***

Taǵdyryma jazsam ba eken aryzdy,
Joǵalttym dep, aıaýlymdy jany izgi...
Basym, keýdem, júregim de Qudaı-aý,
Meniki emes tárizdi...

Kózderimnen muń aýyrlap ketkendeı,
Sózderimniń quny jerge shókkendeı.
Súre alatyn adam kóp qoı ómirdi,
Súıe alatyn jan joq dep em tek mendeı!

Jaratqanǵa aýyr ópke aıta almaı,
Seni súıgen jar jolymnan qaıta almaı...
Tynysh uıyqtap júr me ekensiń túnderde,
Jer ústinde qalaı júrsiń shaıqalmaı!

Únsizdigim sheksizdikke tyǵylyp,
Tún ishinen taǵy shyqtym tirilip.
Janarymnan jylap túsken saǵynysh,
Kirpigińe qaldy me eken ilinip...

Álde ony júr me ekensiń jasyryp, 
Qulatýǵa, umytýǵa asyǵyp.
Ekeýmizdi bir adambyz dep júrgem,
Qaı qıyrda qaldyq eken shashylyp... 

***
Kózge kórinbes kúnálarymdy,
Oqylmaı qalǵan duǵalarymdy...
Alladan buryn pende bitkendi,
Bes kúnge qımaı synaǵanymdy...

...Óshire alam ba keýdemnen?

Esimdi bilmes essiz kúnimdi,
Túgesilgen tózim...kózsiz muńymdy...
Jarıa etip...jalǵannan bezdim,
Qarańǵy dedim, Sizsiz ǵumyrdy...

Ózgererin bárin kim bilgen?

"Jalǵyzbyn" deppin...sezbedi janym,
Túnniń de tunyq kózderi baryn.
Sezimge uıyp syńar etippin,
Ózime tilep, ózgeniń baǵyn...

Kóńildi qalaı sendirgem?

Baǵalaı almaı baqyttarymdy,
Jalǵanǵa qıyp jaqut-tańymdy.
Nurynan Kúnniń jasqandy júzim,
Kim bilsin...búgin ǵarip halimdi...

Janymdy sherge kóndirgen...

Qaıǵyǵa balap, shúkir kúnimdi,
Taǵdyrǵa telgen búkil muńymdy...
Tilimnen shyqqan toǵyz kúnámdi,
Aıtylyp qalǵan kúpirligimdi...

Óshire alam ba keýdemnen?

Dınara MÁLİKOVA