Ótken túnde Almatynyń Naýryzbaı aýdanynda sel júrip, birqatar eldi mekenderde úılerdi tasqyn sý basqan. Bul týraly "Qamshy" portaly habarlaıdy.
"Almatyny sel aldy" bolyp taraǵan bul habardy estigen jurt úılerin tastap shyǵýǵa májbúr boldy. 31 arna tilshisi Irına Sovetjan óziniń feısbýktegi paraqshasynda sel bolǵan aýmaq týraly beınejazbalardy bólisti. Beınejazbadan bilgenimizdeı keıbir kóshelerdi selmen aǵyp kelgen úlken tastar alyp qalǵan. Mundaı úlken tastardan qansha úı men adamdardyń zardap shekkenin mólsherleý qıyn.
"Túngi saǵat úshte Qarǵaly ózeninde sý deńgeıi kóterilgeni týraly habar tústi. Tasqynnan Almatynyń irgesindegi Kamenka men Shapaı aýyldarynyń, Naýryzbaı aýdanynda biraz úılerdi sý alǵan" dep málimdedi Almaty tótenshe jaǵdaılar departamenti bastyǵynyń orynbasary Erlan Nurpeıisov.
Qalalyq tótenshe jaǵdaılar departamenti selden mert bolǵan adamdar joq dep habarlady.
Departament ókili Erlan Nurpeıisov áleýmettik jelide taraǵan "sý tasqyny qaıtalanýy múmkin" degen aqparatty joqqa shyǵardy.
"Tek sý deńgeıi kóterilgen, bógenge zaqym kelmegen. Ekinshi ret sel júrý qaýpi joq, jaǵdaıdy baqylap otyrmyz" deıdi ol.
TJD qazir oqıǵa ornynda 400-den asa qutqarýshy men 85 tehnıka jumys istep jatqanyn habarlady.
Al, Almaty qalasynyń ákimi Ahmetjan Esimov myrza qazirge únsiz. Sý alǵan aımaqty óziniń súıikti "vertaletimen" sharlap júr degen habar tarady. Qazirge velesıpedtpen aralaǵany týraly sybys joq.
Múmkin bul sel Ahmetjan myrzanyń "ákim" taǵynyń aqyry bolar...
Nurzat Toǵjan
,
