Qazaqy jyr men dástúrli mýzykanyń ǵajaıyp keshin ashqan «Nur Otan» partıasy Tóraǵasynyń Birinshi orynbasary Baýyrjan Baıbek jınalǵan jurtshylyqty aldymen Táýelsizdik merekesimen quttyqtady.

«Bul sharanyń osy merekege oraılastyrylýynda da mán bar. Óıtkeni baǵzydan jetken bul jyrlarda ata-babamyzdyń armany men ańsary, azattyq, eldik ıdeıalary, keler urpaqqa amanaty jatyr. Dástúrli ónerimiz san ǵasyrlar boıy urpaq tárbıesine qyzmet etken. Sondyqtan da Táýelsizdiktiń alǵashqy sátinen-aq Elbasy, «Nur Otan» partıasynyń Tóraǵasy Nursultan Nazarbaev ultymyzdyń uly murasyn, ozyq dástúrleri men mádenı qazynasyn túgendeýge, olardy zamanǵa saı túletip, jańǵyrtýǵa erekshe den qoıdy. Halyqtyń partıasy retinde «Nur Otan» da ulttyq qundylyqtarymyzdy dáripteıtin is-sharalardy qoldap, onyń nasıhattalýy men damýyna barynsha úles qosyp keledi. Keshe ǵana ulttyq sport salasynyń úzdikteri marapattalǵan «Altyn tuǵyr» syılyǵyn tabys ettik. Ultymyzdyń tili men dili, mádenıeti men sporty, án-kúıleri men jaýhar jyrlarynsyz halqymyzdyń rýhy myqty bolmaq emes. Biz bolashaqta úlken jetistikterge jetemiz desek, ulttyq qundylyqtarymyz arqyly halqymyzdyń rýhyn kóterýimiz kerek. Bul baǵytta Prezıdent Qasym-Jomart Toqaev naqty tapsyrmalar berdi. Elimizdiń basty saıası uıymy – «Nur Otan» partıasynyń doktrınasynda qamtylǵan basty qundylyqtarymyzdyń biri de – otbasy men dástúr. Onda «qazaq tilin, mádenıet pen dástúrdi damytý bizdiń strategıalyq basymdyǵymyz» ekendigi naqty kórsetilgen», – dep atap ótti Baýyrjan Baıbek.

«Nur Otan» partıasynyń Nur-Sultan qalalyq fılıalynyń tóraǵasy, Nur-Sultan qalasynyń ákimi Altaı Kólginov óziniń quttyqtaý sózinde terme men jyr keshine kelip, ulttyq ónerdi qoldaǵan qaýymǵa alǵys bildirdi.

«Tuńǵysh Prezıdent – Elbasy Nursultan Nazarbaevtyń tarıhı sheshiminiń arqasynda búginde Nur-Sultan qalasy qarqyndy damyp, beıbitshilik pen birlikti nasıhattaıtyn jáne sony ispen dáleldeıtin álem tanyǵan astanaǵa aınaldy. Qazir bas qalamyzda 1 mln 200 myńǵa jýyq halyq bar. Sonymen birge halqymyzdyń sany da ósip keledi. Mysaly, 1998 jyly Selınogradta taza qazaq tilinde oqytatyn bir ǵana mektep boldy. Qazir 36 taza qazaq tildi mektep bar, jalpy 88 bilim ordasynyń qalǵany aralas mektep. Bul – tilimiz ben dilimiz qaıta oraldy degen sóz. Elbasy saıasaty men kópultty memleketimizdiń birliginiń arqasynda osyndaı jetistikterge jetip otyrmyz. Qazirgi ýaqytta Prezıdent Qasym-Jomart Toqaev mádenıet salasyna, ulttyq qundylyqtarymyzdy qoldaýǵa jaǵdaı jasap, bizdiń aldymyzǵa naqty mindetter qoıyp otyr», – dedi Altaı Kólginov.

«Jyr-amanat» jyrshy-termeshiler keshi tuńǵysh ret erekshe formatta ótti. Jyr keshi konsert pen spektákl janryn úılestirdi. Al keler jyly «Jyr-amanat» konsert-spektakli partıanyń qoldaýymen Nur-Sultan qalasy kúnine oraı «Esildiń jaǵasynda jarqyraıdy bir qala» taqyrybynda uıymdastyrylmaq.

Aıta keteıik, kúzde «Nur Otan» partıasynyń qoldaýymen, elimizdiń birqatar óńirinde aıtys festıvalderi uıymdastyryldy. Aıtys óneriniń dodasy 16-17 jeltoqsanda Oral qalasynda ótetin «Altyn dombyra» respýblıkalyq festıvalinde máresine jetedi. «Nur Otan» partıasynyń janyndaǵy «Mıras» respýblıkalyq qoǵamdyq keńesi músheleriniń bastamasymen memlekettik tildi damytý tetikterin pysyqtaý úshin arnaıy komısıa qurylǵan bolatyn.