Jambyl oblysy polısıa departamentiniń baspasóz qyzmeti Qordaı aýdany Masanshy aýylynda turǵyndar arasynda jappaı tóbeles bolǵanyn habarlady.
"Masanshy aýylynda turǵyndar arasynda jappaı tóbeles boldy. Polısıa kúshimen qaqtyǵys toqtatyldy, jaǵdaı baqylaýda. Jambyl oblysy Polısıa departamentiniń Tergeý basqarmasy Qazaqstan Respýblıkasy Qylmystyq kodeksiniń 293-baby (buzaqylyq) boıynsha sotqa deıingi tergeýdi bastady.Qaqtyǵysty bastaýshylar men qatysýshylar anyqtalýda.Jambyl oblysynyń polısıa departamenti azamattardan tek resmı aqparatqa senýdi jáne qaýesetter men jalǵan habarlamalardy taratpaýdy suraıdy. Jalǵan aqparatty, onyń ishinde áleýmettik jeliler men messendjerler arqyly taratqany úshin qylmystyq jaýapkershilik qarastyrylatynyn eskertemiz." delingen polısıa departamentiniń habarlamasynda.
Buǵan deıin áleýmettik jelide Jambyl oblysy Qordaı aýdanynda dúngen ultynyń azamattary "80 jastaǵy qazaq qarıa men onyń eki balasyn armatýramen, balǵamen uryp, basyn jarǵany" týraly aqparat taraǵan. Áleýmettik jelide taraǵan vıdeolardyń birinde polısıa ókilderi men azamattar arasynda qaqtyǵys bolyp jatqany baıqaldy.
Masanshy - Jambyl oblysy Qordaı aýdanynda ornalasqan aýyl. Resmı aqparat boıynsha, ol aýylda 13 myńnan astam adam turady. Turǵyndardyń 90 paıyzy dúngen ultynyń ókilderi.
Pikir qaldyrý