Ótinish berý tártibi tómendegideı:

42500 teńgeni alýǵa jumys oryndary tarapynan ótinish berilgen azamattar úshin áleýmettik tólem taǵaıyndaýdan bas tartý týraly sheshimdi qaıta qaraý ótinishin de jumys oryndary beredi. Shaǵyn jáne orta bıznes ókilderi, iri kásipkerler, komersıalyq emes zańdy tulǵalar ótinishti áleýmettik tólem taǵaıyndaýdan bas tartý týraly sheshim qabyldanǵan qyzmetkerleri úshin beredi.

Áleýmettik tólemdi taǵaıyndaýdan bas tartý týraly sheshim qabyldanǵan jeke kásipkerler, jeke praktıkamen aınalysatyn adamdar, biryńǵaı jıyntyq tólem tóleýshileri, azamattyq-quqyqtyq sıpattaǵy sharttar boıynsha jumys isteıtin adamdar ótinishti óz betinshe beredi.

Qajetti qujattar tizbesi:

Qyzmetkerleri úshin qujattar ótkizetin jumys berýshiler:

– jalaqysy saqtalmaıtyn demalysqa jiberý týraly buıryq;

– jumys berýshiniń TJ kezeńinde kirisin joǵaltý faktisin rastaıtyn qujattar (banktik shottardan úzindilerdi qosa alǵanda, qarjylyq jáne ózge de eseptilik, býhgalterlik balans jáne basqa qujattar);

– memlekettik kirister organdary qabyldaǵan deklarasıa (MKK-men salystyrý úshin, 200-nysan).

Jeke kásipker jáne jeke praktıkamen aınalysatyn adamdar úshin:

– memlekettik kirister organdary qabyldaǵan deklarasıa (MKK-men salystyrý úshin, 200-nysan);

– tabystyń joǵaltý faktisin rastaıtyn qujattar (banktik shottardan úzindilerdi qosa alǵanda, qarjylyq jáne ózge de eseptilik, býhgalterlik balans jáne basqa da qujattar).

Azamattyq-quqyqtyq sıpattaǵy sharttar boıynsha jumys isteıtin adamdar úshin:

– zańdy tulǵamen jasalǵan jumystardy oryndaýǵa (qyzmet kórsetýge) arnalǵan AQS sharty.

Usynylǵan qujattardy qaraǵannan keıin aýdandyq (qalalyq) shtab "42 500 teńge" áleýmettik tólemin taǵaıyndaýǵa quqyǵy bar/joǵy týraly qorytyndy shyǵarady.

Oń qorytyndy "Azamattarǵa arnalǵan úkimet" memlekettik korporasıasy" KEAQ bólimshesine beriledi, ol "Ótinish berýshiniń elektrondyq is maketin" qalyptastyrady jáne derekterdi MÁSQ fılıalyna beredi. MÁSQ fılıaly áleýmettik tólem taǵaıyndaý nemese taǵaıyndaýdan bas tartý týraly sheshim qabyldaıdy.

Aýdandyq (qalalyq) shtabtyń qorytyndysymen nemese MÁSQ fılıalynyń sheshimimen kelispegen jaǵdaıda, ótinish berýshi rastaıtyn qujattarmen aýdandyq (qalalyq) shtabtyń jumys organy arqyly oblystyq (qalalyq) shtabqa júginedi.

Oblystyq (qalalyq) shtab «42 500 teńge» áleýmettik tólemin taǵaıyndaý quqyǵynyń bar/joǵy týraly qorytyndy shyǵarady. Oń qorytyndy «Azamattarǵa arnalǵan úkimet» memlekettik korporasıasy» KEAQ bólimshesine jáne odan ári MÁSQ fılıalyna beriledi.

Karantın talaptaryn eskere otyryp, adamdardyń jappaı jınalýyna jol bermeý maqsatynda ótinishter 2020 jylǵy 1 jeltoqsanǵa deıin qaralatyn bolady.