2020 jylǵy 9-13 shilde aralyǵynda QR QM Qarjy monıtorıńi komıtetiniń Atyraý oblysy boıynsha Ekonomıkalyq tergeý departamentiniń (ETD) qyzmetkerleri dárilik preparattar men jeke qorǵaný quraldaryn zańsyz satýdyń 3 faktisiniń jolyn kesti. Bul týraly atalǵan departamenttiń baspasóz qyzmeti habarlaıdy.
Oblystyq polısıa departamentiniń qyzmetkerlerimen birlesip, jedel-izdestirý is-sharalaryn júrgizý barysynda ETD qyzmetkerleri dárilik zattardy joǵary baǵamen jáne ruqsat qujattarynsyz (lısenzıasyz) satýdyń 2 faktisin anyqtady.
Atyraý qalasynyń eki turǵyny dári-dármekterdi zańsyz satqan. Olardan 400-den astam býma, 50 flakon jáne ampýla tapshy preparattar (parasetamol, deksametazon, lıdokaın, seftrıakson, azıtromısın, asetılsalısıl qyshqyly, metronıdazol) tárkilendi. Tárkilengen dári-dármekter Atyraý oblysy ákimdiginiń densaýlyq saqtaý basqarmasyna tapsyryldy.
Sondaı-aq, ETD qyzmetkerleri Polısıa departamentimen birlesip, tekseris barysynda taǵy 137 500 medısınalyq maskany tárkiledi.
Aıypty tulǵalardyń áreketterinde QR ÁQBtK-niń 424-baby («Zańsyz medısınalyq jáne (nemese) farmasevtıkalyq qyzmet») jáne 426-babynda («Farmasevtıkalyq qyzmettiń jáne dárilik zattar men medısınalyq buıymdardyń aınalysy salasynyń qaǵıdalaryn buzý») kózdelgen ákimshilik quqyqbuzýshylyq belgileri bar. İs materıaldary atalǵan tulǵalardy ákimshilik jaýapqa tartý úshin ókiletti organǵa joldandy.
