Óńirde koronavırýstyq ınfeksıa indetiniń taralýy bastalǵaly oǵan qarsy kúreste óndiris mekemeleri qol ushyn berip keledi. «Ersaı» kompanıasy da el úshin qıyn sátte qarap qalmady. Sáýir aıynda kompanıa Qaraqıa aýdandyq aýrýhanaǵa teplovızorlar, jeke qorǵanysh kıimderi men dári-dármekter tabys etti. Sondaı aq, jýyrda Mańǵystaý oblystyq jáne Qaraqıa aýdandyq aýrýhanalaryna barlyǵy 6 ottegi konsentratory, 2 EKG apparaty, 130 púlsoksımetr, 10 ottegi jastyqshasy, 900 qorǵanysh kıimder, 7500 medısınalyq qolǵaptar, 1800 bir rettik medısınalyq betperdeler, 1500 KN95 respırator jetkizdi. Sondaı-aq, koronavırýs pen pnevmonıany emdeýge qajetti 17 túrli dáriden barlyǵy 9245 dana dári - dármek berildi.

Tapsyrylǵan medısınalyq zattar koronavırýs pen pnevmonıanyń asqynǵan túrimen aýyratyn naýqastar úshin birinshi qajettilikter. «Bul biz úshin úlken qoldaý, sebebi ákelingen medısınalyq qurylǵylar men dári-dármekter kez kelgen ýaqytta naýqas azamattardyń ómirin saqtap qala alady» - dedi Qaraqıa aýdandyq ortalyq aýrýhananyń bas dárigeri Gúlshara Begnıaz.
Sonymen qatar, «Ersaı» kompanıasy bıznestiń áleýmettik jaýapkershiligi aıasynda «Olımp» PTR test laboratorıasynyń qýattylyǵyn arttyrý maqsatynda qajetti avtomatty jabdyqty satyp alý úshin qarjylaı kómek kórsetý jóninde sheshim qabyldap, halyqtyń áleýmettik turǵydan osal toptaryn testileý úshin óteýsiz 10000 PTR test synamasyn berdi. Kompanıa ókili B.Chınáev aldaǵy ýaqytta da indetpen kúresýde óńir turǵyndary men medısınalyq mekemelerge kómek kórsetýdi jalǵastyratynyn jetkizdi.