«Nur Otan»-nyń partıaishilik irikteýi – praımerızge qatysýshylardy tirkeý bastaldy. Alǵashqy birneshe saǵat ishinde 500-ge jýyq adam praımerızge qatysýǵa nıet bildirdi.

Qostanaı oblysyndaǵy partıalyqtar 157 ótinish joldap erekshe belsendilik tanytty. Aqmola oblysyndaǵy partıa múshelerinen 110 ótinish kelip tústi. Bastaýysh partıa uıymdary 129 adamdy usynsa, 342 adam (72,6%) – ózin-ózi usynǵan.

Praımerızge qatysý úshin ótinishti primaries.kz saıtynda «Praımerız» aqparattyq júıesi arqyly onlaın joldaýǵa nemese aýmaqtyq uıymdastyrý komıtetterine jeke ótinish berýge bolady. Kandıdattardy usyný jáne tirkeý 28 tamyzǵa (qosa eseptegende) deıin jalǵasady.

Eske sala keteıik, partıa lıderi Nursultan Nazarbaevtyń tapsyrmasymen «Nur Otan» praımerızi elimizdiń partıalyq-saıası damý tarıhynda tuńǵysh ret respýblıkalyq partıaishilik saılaý aýqymynda ótedi. Bul – Elbasynyń bastamasymen qolǵa alynǵan «Senim. Dıalog. Bolashaqqa nyq qadam» partıa jumysyn «qaıta jandandyrý» baǵdarlamasynyń qorytyndy kezeńderiniń biri. 

Kandıdattar praımerızge bastaýysh partıa uıymynyń atynan nemese ózin-ózi usyný jolymen de qatysýy múmkin. Bul rette partıanyń qundylyqtaryn ustanatyn jáne saılaý quqyǵy bar kez kelgen azamat úmitker bola alady. Ol úshin praımerızge qatysýshylardy tirkeý merzimi aıaqtalǵanǵa deıin «Nur Otan»-nyń qataryna qosylý kerek.

Praımerızdiń negizgi maqsaty – aldaǵy Májilis pen barlyq deńgeıdegi máslıhattar saılaýyna partıalyq tizimderge engizý úshin qoǵamnyń senimi men qoldaýyna ıe bolǵan bedeldi partıa kóshbasshylaryn anyqtaý.

Sonymen, kandıdattardy usyný jáne tirkeý 17 tamyzdan bastalyp, 28 tamyzǵa (qosa eseptegende) deıin jalǵasady. Úmitkerlerge úgit-nasıhat jumystaryna daıyndalý úshin 7 kún beriledi - 31 tamyzdan 6 qyrkúıekke deıin.

7 qyrkúıekten 3 qazanǵa deıin aralyqta kandıdattardyń úgit-nasıhat jumystaryn, onyń ishinde 14-30 qyrkúıek aralyǵynda jarıa pikirsaıystar ótedi. Pikirsaıystar «Praımerız» arnaıy aqparattyq júıesi arqyly ótip, partıanyń resmı akkaýnttarynda taratylady.

Osyǵan baılanysty partıa Tóraǵasynyń tapsyrmasy boıynsha onlaın-formatta daýys berý úshin platforma ázirlendi. «Praımerız» júıesi turǵyndarmen keri baılanysty barynsha kúsheıtýdi, jalpy jurtshylyqtyń pikirlerin eskere otyryp, túrli bastamalar men zań jobalaryn onlaın-talqylaý múmkindigin kózdeıdi. 

1 qazan (00-00) men 3 qazan (14.00) aralyǵynda mobıldi qosymsha jáne arnaıy veb-portal arqyly elektrondy daýys berýdi ótkizý josparlanyp otyr.

Daýys berýdiń sońǵy kúni (3 qazan) bastaýysh partıa uıymdarynyń bazasynda saılaý ýchaskeleri ashylady. Internet joq eldi mekenderde osyndaı saılaý ýchaskelerine kelip, qaǵaz búletender arqyly daýys berýge bolady.

Úmitkerlerdiń reıtıńi kórsetilgen praımerız nátıjeleri 5 qazanda jarıalanady.

Aıta keteıik, buǵan deıin «Nur Otan» partıasy praımerız ótkizý, sondaı-aq, kandıdattarǵa uıymdastyrýshylyq jáne quqyqtyq qoldaý kórsetý máseleleri boıynsha 8 (800) 080 4441 arnaıy jelini iske qosqan bolatyn. Sońǵy 2 aıdyń ózinde atalǵan jelige 15 myńǵa jýyq qońyraý túsken. Olardyń ishinde ótinish bildirgenderdiń jartysynan kóbi 30 ben 44 jas aralyǵyndaǵy adamdar.