Túrkistan oblysynyń polısıa departamenti balasyn sabaǵan ákege qatysty tergeý júrgizilip jatqanyn habarlady.
Buǵan deıin jýrnalıs Jazıra Begaly facebook paraqshasyna "KÁMELETKE TOLMAǴAN ÚSH BALA MEN ANASYNYŃ ÓMİRİNE QAÝİP TÓNİP TUR" degen jazba jarıalaǵan.
Ol jerde ózine Qazyǵurt aýdany Qyzylqıa aýylynyń Mahabbat Sádýaqasqyzy esimdi turǵynynyń habarlasqany, ýchaskelik polıseı bolyp isteıtin quda balasyna senip alǵan kelinshektiń kúıeýi Erjan Daýyrbaev 4 jyldan beri áıeli men balalaryn uryp kele jatqanyn aıtylǵan.
Shaǵymdanýshy áıeldiń sózinshe, buǵan deıin polısıaǵa shaǵymdanǵanynda onyń aryzy qabyldanbaǵan kórinedi.
Jýrnalıs jazbasynan keıin uzamaı Túrkistan oblysynyń polısıa departamenti balasyn sabaǵan ákeniń tergelip jatqanyn habarlady.
"Áleýmettik jelilerge monıtorıń júrgizý barysynda Túrkistan oblysy Polısıa departamentiniń polıseıleri belgisiz er adamnyń kámeletke tolmaǵan balany uryp-soǵyp jatqan beınejazbasyn anyqtady. Tekserý barysynda oqıǵanyń Qazyǵurt aýdanynda bolǵany aıqyndaldy" dep habarlady departamenttiń baspasóz qyzmeti.
Atalǵan jaıt qylmystyq kodekstiń 110-baby "Azaptaý" boıynsha Qazyǵurt aýdandyq polısıa bóliminde tirkelgen.
Pikir qaldyrý